Bugun Buxoro davlat universitetida “O‘zbekiston fiziklar kengashi”ning raisi, O‘zR.FA akademigi, o‘zbek xalqining atoqli shoiri va yozuvchisi, akademik Gʻafur Gʻulomning o‘g‘illari, Yadro fizikasi sohasining taniqli olimi Qodir Gʻofurovich Gʻulomov hamda Buxoro davlat universitetini jahonga tanilishida, Respublikamiz uchun yetuk kadrlarni tayyorlashda katta hissa qo‘shgan, 1992-2004 yillar davomida Buxoro davlat universiteti rektori bo‘lgan olim, f.-m.f.d., professor, O‘zR.FA akademigi, Magnitooptika sohasining taniqli olimi Komil Muqimovich Muqimovlar tashrif buyurishdi. BuxDu rektori O.Xamidov boshchiligida mehmonlar Buxoro davlat universitetida so`nggi yillarda bo`lgan o`zgarishlar bilan tanishishdi. Tashrif buyuruvchilar avval Buxoro davlat universitetining “Biznes akselerator” xonasi hamda BuxDU muzeyini ko`zdan kechirishdi. Olim Komil Muqimov universitetda rektor bo`lgan damlaridagi xotiralarini o`rtoqlashdi. Fikr almashish asnosida, muzeydagi har bir ashyo tarixi bilan tanishishdi. Shundan so`ng, katta faollar zalida universitet rahbariyati, professor-o`qituvchilar, talabalar bilan birgalikda uchrashuv bo`lib o`tdi. Samimiy suhbat tarzida o`tgan uchrashuvda adabiyot, fizika, ilm-fan xususida so`z bordi. Talabalar o`zlarini qiziqtirgan savollar bilan murojaat etishdi. Uchrashuv yakunida mehmonlarga esdalik sovg`alari ulashildi.BuxDU Matbuot xizmati
