Bugungi kunda O‘zbekiston va kunchiqar mamlakat Yaponiya oʻrtasida innovatsiya, fan-taʼlim va madaniyat sohasidagi koʻp qirrali hamkorlik jadal sur’atlarda rivojlanmoqda. Davlatimiz rahbari Shavkat Mirziyoyevning 2019-yil 17-20-dekabr kunlari Yaponiyaga rasmiy tashrifi yakunlari bo‘yicha 18 ta ikki tomonlama bitimlar imzolanganligi buning yorqin misolidir.Joriy yilning 29-sentyabr kuni BuxDU тalabalar turar joyida “ O‘zbekiston -Yaponiya Markazi” rahbariyati hamda Tarix va madaniy meros fakulteti, Milliy g‘oya, ma’naviyat asoslari va huquq ta’limi kafedrasi professor-o‘qituvchilari Turdiyev Bexruz, Shirinov Anvar, Abdullayeva Feruzalar tomonidan “O‘zbekiston ‒ Yaponiya: madaniyatlar uyg‘unligi” nomli ma’naviy-ma’rifiy tadbir ikki davlat o‘rtasidagi madaniyatlar uyg‘unligini ko’rsatishga xizmat qildi.Tadbir kirish so‘zini falsafa fanlari doktori, (PhD) Turdiyev Bexruz ochib berar ekan, u O‘zbekiston va Yaponiya madaniyatining o’zaro uyg‘un jihatlari, jumladan, ikki xalqda ham millatparvarlik, vatanparlik, mehnatsevarlik, insonparvarlik, oliyjanoblik, sharqona mehmondo‘stlik tuyg‘ularining mushtarak ekanligi, yapon maktablarida bizning “Tarbiya” fanimizga o‘xshash “Yapon xulqi” fanining o‘tilishi, boshlang‘ich maktab o‘qituvchilari va bog‘cha tarbiyachilari ma’naviy tarbiya bo‘yicha maxsus sertifikat olishi majburiy ekanligi, o‘quvchilarga yapon millati ruhini singdirish murabbiylarning eng asosiy vazifalardan biri ekanligi haqidagi qiziqarli ma’lumotlar bilan ochib berdi.Shundan so’ng, “O‘zbekiston-Yaponiya Markazi” rahbari Maxmudov Shaxrux so‘zga chiqib, O‘zbekistonning Yaponiya bilan 1992-yil 26- yanvardan diplomatik munosabatlar o‘rnatganligi, 1999-yildan boshlab O‘zbekistonda Yaponiya xalqaro hamkorlik agentligi (JICA) va 2007-yildan buyon esa, Buxoroda “O‘zbekiston-Yaponiya Markazi” o’z faoliyatini olib borayotganligi to’g’risidagi ma’lumotlar bilan o‘rtoqlashdi.Kafedra professor-o‘qituvchilari Shirinov Anvar va Abdullayeva Feruzalar ham bugun yurtimizda 130 dan ortiq millat va elat, 16 ta diniy konfessiyalar vakillari hamjihatlikda yagona oila bo‘lib yashab, mamlakat taraqqiyotiga o‘zlarining munosib hissa qo‘shib kelishayotganligini, Yaponiyaning O‘zbekiston uchun ishonchli va strategik sherik ekaniligini e’tirof etishdi.Tadbirning badiiy qismida “O‘zbekiston-Yaponiya Markazi” vakillari tomonidan bayramona ekspozitsiyalar: an’anaviy folklor san’ati namunalari, yapon xalqining milliy taomlari, milliy liboslari, qadimiy anʼanalari, milliy o‘yinlari, milliy ta’lim tizimidagi imkoniyatlari haqidagi ma’lumotlarini taqdim etishdi. Ayniqsa, “O‘zbekiston-Yaponiya Markazi” madaniyat bo‘limi koordinatori Yakimov Filipp hamda Yapon markazi havaskor guruhi tomonidan tashkil etilgan origami san’ati bo‘yicha master-klass va yapon milliy o‘yinlari talabalarning katta qiziqishiga sabab bo’lib, talaba-yoshlarga bayramona kayfiyat baxsh etdi.Samimiy va doʻstona muloqot tarzida oʻtkazilgan “O‘zbekiston ‒ Yaponiya: madaniyatlar uyg‘unligi” nomli ma’naviy-ma’rifiy tadbir talaba-yoshlarga katta taassurot qoldirdi.
