Yangi Oʼzbekistonning sporti, sanʼati va madaniyati ham tarixiy anʼanalar va zamonaviy qarashlar uygʼunligida oʼzining yangi rivojlanish bosqichiga chiqib bormoqda. Аlbatta, bu kabi oʼzgarishlarning zamirida sport, sanʼat va madaniyat hamda badiiy taʼlimga berilayotgan eʼtibor va gʼamxoʼrlik, yurtimizda yuz berayotgan tarixiy jarayonlar turibdi, desak mubolagʼa boʼlmaydi. Yoshlarimiz orasida sport, tasviriy va amaliy sanʼat, sanʼatshunoslik sohalariga qiziqish yildan-yilga oshib borayotgani ham ana shu eʼtibor samarasi, deyish mumkin.Bugun erta tongdan Buxoro davlat universitetida ham kasbiy (ijodiy) imtihonlarga start berildi. Imtihon boshlanishidan oldin BuxDU rektori O.X. Xamidov abituriyentlar qabul qilinadigan kirish yo`laklarini, ularga yaratilgan shart-sharoit hamda pandemiya sharoitida abituriyentlarning sog`ligini saqlash maqsadida qilingan ishlar natijasi bilan tanishib chiqdi. Shundan so`ng respublikaning boshqa OTMlaridan tashrif buyurgan komissiya a’zolari bilan yig`ilish o`tkazildi. Ularga jarayonni shaffof olib borish, korrupsion holatlarga yo`l qo`ymaslik yana bir bor eslatildi. Har birlaridan ana shu masala yuzasidan kafolat xatlari olindi.Buxoro davlat universitetida joriy oʼquv yilida abituriyentlar “Vokal sanʼati: anʼanaviy xonandalik”, “Cholgʼu ijrochiligi: xalq cholgʼulari (rubob prima, qashqar vaa afgʼon rubobi)”, “Rangtasvir: dastgohli”, “Аmaliy sanʼat: badiiy kulolchilik”, “Sport faoliyati: boks”, “Sport faoliyati: kurash”, “Sport faoliyati: futbol”, “Sport faoliyati: erkin kurash”, “Sport faoliyati: voleybol” yoʼnalishlari boʼyicha jami 730 nafar abituriyent kasbiy (ijodiy) imtihonlarni topshiradi.Shuningdek, Prezidentimizning «2021/2022 oʼquv yilida Oʼzbekiston Respublikasining oliy taʼlim muassasalariga oʼqishga qabul qilishning davlat buyurtmasi parametrlari toʼgʼrisida»gi qaroriga asosan joriy oʼquv yilidan boshlab alohida iqtidor talab etiladigan bakalavriat taʼlim yoʼnalishlariga oʼqishga qabul qilishda abituriyentlardan kasbiy (ijodiy) imtihonlardan soʼng majburiy uchta – ona tili (oʼzbek, rus yoki qoraqalpoq tili), matematika va Oʼzbekiston tarixi fanlari boʼyicha Davlat test markazi tomonidan test sinovlari oʼtkazilishi belgilandi.BuxDU Matbuot xizmati