Mamlakatimizda ustuvor vazifa sifatida belgilangan har bir sohada ochiqlik va shaffoflik tamoyillarini ta’minlash zarurati nafaqat tashkilot-muassasalar mutasaddilari, balki jamoatchilik vakillari zimmasiga ham alohida mas’uliyat yuklamoqda. Bu borada deputatlar, turli nodavlat notijorat tashkilotlari vakillarining ishtiroki joylardagi muammolarni o‘z vaqtida aniqlash va bartaraf etish, ularga birgalikda yechim topish jarayonida qo‘l kelmoqda. Bu sinovdan o‘tgan tajriba ayni kecha-kunduzda oliy ta’lim muassasalarida kechayotgan ijodiy imtihonlar jarayonlarini tashkil etishda ham o‘z samarasini bermoqda.Xalq deputatlari viloyat Kengashi deputatlari, O‘zbekiston Respublikasi Mudofaa vazirligi huzuridagi Jamoatchilik kengashi viloyat mintaqaviy bo‘limi a’zolari, Respublika Ma’naviyat va ma’rifat markazi viloyat bo‘limi rahbari Marhabo Pardayeva hamda O‘zbekiston Yozuvchilar uyushmasi viloyat bo‘limi rahbari Shodmon Sulaymonov ayni shu maqsadda Buxoro davlat universitetida o‘tkazilayotgan ijodiy imtihonlar jarayonlarini ko‘zdan kechirishdi. Ularga viloyat Kengashi deputati, Buxoro davlat universiteti rektori Obidjon Xamidov hamda Jamoatchilik kengashi viloyat mintaqaviy bo‘limi mas’ul kotibi Sayfullo Majidovlar hamrohlik qilishdi.Shu kecha-kunduzda mazkur oliy ta’lim muassasasida musiqa va qo‘shiqchilik san’ati, jismoniy madaniyat, tasviriy va amaliy san’at, chaqiriqqacha harbiy tayyorgarlik ta’lim yo‘nalishlari bo‘yicha ijodiy imtihonlar o‘tkazilmoqda. Jamoatchilik kengashi a’zolari bu yerda abituriyentlar uchun, ayniqsa, ijodiy imtihonlar jarayonini shaffof tashkil etish maqsadida yaratilgan sharoitlar bilan yaqindan tanishishdi. Mazkur jarayonga xalal beradigan turli ichki va tashqi omillarning oldini olish borasida ko‘rilayotgan choralarning samara berayotgani e’tirof etildi. Jumladan, ijodiy imtihonlar o‘tkazilayotgan har bir hududda kuzatuv kameralarining o‘rnatilganligi, abituriyentlarning ota-onalari va yaqinlari uchun mazkur jarayonlarni uyda turib internet orqali onlayn kuzatish imkoniyati yaratilganligi, imtihon komissiyasi a’zolari va kuzatuvchilarning betaraf vakillar asosida shakllantirilganligi jarayonda shaffoflikni ta’minlash hamda korrupsiogen holatlarning oldini olishda muhim ahamiyat kasb etishi qayd etildi. Xalq deputatlari viloyat Kengashi qonuniylikni ta’minlash va korrupsiyaga qarshi kurashish masalalari bo‘yicha doimiy komissiyasi a’zolari bo‘lgan deputatlar kuzatish jarayonida bu dolzarb masalaga alohida e’tibor qaratishdi.Jamoatchilik kengashi a’zolarida, ayniqsa, chaqiriqqacha harbiy ta’lim yo‘nalishi bo‘yicha ijodiy imtihonlar jarayoni o‘zgacha taassurot qoldirdi. Viloyatimizdan tashqari, respublikamizning turli hududlaridan hujjat topshirgan abituriyentlar ishtirokida kechgan imtihon jarayonlari belgilangan karantin talablari asosida tashkil etilmoqda. Abituriyentlarning sog‘ligi, imtihon jarayoniga ma’nan, ruhan va jismonan tayyorgarligi muntazam nazorat qilib turiladi, tibbiyot xodimlari va psixologlar tomonidan ularga zarur tibbiy yordam va maslahatlar berish uchun barcha sharoitlar yaratilgan.Kengash a’zolarining abituriyentlar bilan jonli muloqoti, Vatanimiz va istiqlolimiz tarannum etilgan moʻjaz mushoira bo‘lajak Vatan himoyachilariga o‘ziga xos motivasiya bag‘ishladi. Mudofaa vazirligi huzuridagi Jamoatchilik kengashi viloyat mintaqaviy bo‘limi axborot xizmati hamda Buxoro davlat universiteti Matbuot xizmati hamkorligida tayyorlandi
