Do`stlik darvozasi – Toshkentda joriy yilning 21-iyun kuni boshlangan O`zbekiston – Vengriya rektorlar forumi Samarqandga tashrifidan so`ng 23-iyunda Buxoroga “yo`l oldi.”Forumda Vengriyadan tashrif buyurgan nufuzli delegatsiya qatorida boshqa viloyat – Navoiy, Xorazm hamda Qoraqalpog`iston Respublikasi oliy o`quv yurtlari rektorlari, oliy dargohlarning filial direktorlari ishtirok etishdi.Vengriya universitetlari bilan o‘zaro hamkorlik memorandumlarini imzolash, ta’lim, ilmiy va innovatsion hamkorlik aloqalarini rivojlantirish masalalarini muhokama qilish masalasini ko`zlagan forumni Buxoro davlat universiteti rektori, professor Obidjon Xamidov ochib berdi:Ko`tarinki ruh va keng doirada o`tkazilayotgan O‘zbekiston- Vengriya oliy o‘quv yurtlari rahbarlari forumi va uning ishtirokchilarini Buxoro davlat universitetida ko`rayotganligimizdan mamnunmiz. Ta’kidlash joizki, Vengriya bilan O‘zbekistonni, xususan Buxoroni qadimdan ko‘plab rishtalar bog‘lab turadi. Venger olimi Herman Vamberining o‘z vaqtida bizning o‘lkamizga tashrifi va tashrif natijasida ko‘plab mumtoz asarlar, folklor namunalarini xorijda chop etganligi Vengriya olimlarining bugungi O‘zbekiston hududiga, uning madaniyati, tarixi, adabiyotiga bo‘lgan qiziqishlariga yo‘l ochib bergan.Tadbirning o‘z tarixi va madaniyati bilan dunyoga mashhur bo‘lgan Buxoro shahrida o‘tkazilayotgani tasodif emas. Aynan Buxoroda butun Markaziy Osiyodagi ilk oliy ta’lim muassasalari faoliyat ko‘rsatgan. Oliy ta’limning ildizlari Forjaq madrasasi (8-asr), Gʻarbiya madrasasi (11-asr), Ulug‘bek madrasasi (1417-yil) kabi ilm va ma’rifat dargohlariga borib taqaladi. Olamga mashhur Mir Arab madrasasi 1535-yilda qurilgan bo‘lib, butun Markaziy Osiyoda faoliyat ko‘rsatayotgan eng qadimgi ta’lim muassasasi hisoblanadi.Shuni alohida ta’kidlamoqchimanki, biz Vengriya oliy o'quv yurtlari bilan barcha oliy ta'lim sohalarida, hamkorlik qilishga tayyormiz. Ma'muriy va ilmiy xodimlarimizni Vengriyaga tajriba almashish va o`qish uchun yuborishni maqsad qilganmiz. Oliy ta'lim jarayonlarini raqamlashtirish, masofaviy ta'limdagi ustuvor metodlar, zamonaviy o'qitish texnikalari, agronomiya va biotexnologiyalar, axborot texnologiyalari, loyihalarni boshqarish va boshqa ko'plab yo'nalishlar bo'yicha treninglar biz uchun alohida qiziqish uyg'otmoqda. Ayniqsa, PhD stipendiya dasturlari tadqiqotchilarimiz qatorida bizni ham qiziqtiradi. O'qituvchilarning akademik almashinuvini yo'lga qo'yish maqsadida venger akademik xodimlarini universitetimizda, oflayn yoki onlayn shaklda o'qitish uchun qabul qilishni yo`lga qo`ysak, kutilayotgan yuksak natijalarni olishimizga ishonaman. Muhim sohalarda bakalavr va magistratura bosqichlarida ikki karra diplom dasturlarini ishga tushirishga tayyormiz. Universitetimiz bitiruvchilarining nisbatan kam soni Stipendium Hungaricum dasturlari orqali Vengriyada tahsil olmoqda, O`zbekistonlik talabalar uchun ko'proq joy ajratilishiga umid qilamiz. Agronomiya va biotexnologiya fakultetimiz binosida tashkil etilayotgan "Agropolis”ga Vengriya kompaniyalari va universitetlarini hamkorlik qilish uchun taklif qilamiz. Ushbu forum samimiy hamkorligimiz va xalqlar o`rtasidagi do`stligimizning davomi bo`lishiga ishonaman.Shundan so`ng, so`zga chiqqan Vengriya delegatsiyasi rahbari, Vengriya Diplomatik akademiyasi va “Stipendium Hungarium” dasturi Davlat kotibi, fan doktori Orsoyo Pasai-Tomashich Vengriya oliy ta’lim muassasalarining bu forumdan ko‘plab maqsadlarni ko‘zda tutgani, bu ikki taraflama manfaatli bo‘lishini alohida ta’kidladi: “Bugungi uchrashuv ajoyib tarzda start oldi. Barchamizning maqsadimiz bitta: Taraqqiyotga erishmoqchimiz. O`ylaymanki, ushbu forumning natijasi davomli bo`ladi. Universitetni ko`rish imkoniga ega bo`lganimiz va bu uchun alohida vaqt hamda kuch ajratganingiz uchun tashakkur. Bugun shunday kunki, barcha masalalarni shu bugunoq amalga oshirish pallasi. Orziqib kutilgan juda ta’sirli forum uchun, samimiy mehmonnavozlik uchun katta rahmat.”So‘ngra yalpi majlis ma'ruzalari boshlandi. Vengriya rektorlari konferensiyasi raisi, Etvyosh Lorand universiteti rektori Laslo Borxi “Vengriyada oliy ta'lim: tizim faoliyati, o‘ziga xosliklari, yutuqlar va muammolar. Oliy ta'lim sohasidagi Vengriya va O‘zbekiston o‘rtasidagi hamkorlik istiqbollari” nomli ma’ruzasi bilan majlisni boshlab berdi: “ Bu forumga Vengriya universitetlaridan 60 dan ortiq rektorlar tashrif buyurishdi. Ular faoliyat olib borayotgan universitetlar hamda institutlar muhandislik, texnologiya, tabiiy fanlar, metallurgiya, tibbiyot, iqtisodiyot, ekologiya, filologiya sohalarini qamrab olgan. Aytish joizki, ayni vaqtda Vengriya hukumati tashabbusi asosida o’zbek yoshlari uchun Vengriya universitetlarida bakalavriat, magistraturada davlat granti asosida 100 dan ortiq joylar ajratilgan”.– Bugun forumning navbatdagi mazmunli kuni va biz Buxorodamiz. O`zbekiston va uning ta’lim tizimi butun dunyoni qiziqtiryapti. O`zbek-venger hamkorligi yo`lida tashkil etilgan forum ikki tarafni birlashtiradi. Natijalar tez orada quvontirishiga ishonamiz,” – dedi Secheni Ishtvan universiteti ilmiy ishlar bo`yicha prorektori Ester Lukash. Shundan so`ng, Buxoro muhandislik-texnologiya instituti rektori, professor Nusratilla Barakayev, Buxoro davlat tibbiyot instituti rektori professor Shuhrat Teshayev, Toshkent irrigatsiya va qishloq xo`jaligini mexanizatsiyalash muhandislari instituti Buxoro filiali rektori, professor Shavkat Imomovlar oliygohlarining salohiyati, bugungi kunda amalga oshirilayotgan yangiliklar va istiqbolli rejalari xususidagi taqdimotlari bilan forum ishtirokchilarini tanishtirdilar.Forum doirasida jami 10 memorandum imzolanib, Buxoro davlat universiteti Vengriyaning 4 universiteti bilan hamkorlik aloqalarini o`rnatdi. Eötvös Lorand universiteti, Széchenyi Istvan universiteti, Debretsen universiteti, Budapesht texnologiya va iqtisodiyot universiteti shular jumlasidandir.Buxoro davlat universiteti Matbuot xizmati
