Oliy ta’lim tizimi respublika ijtimoiy-iqtisodiy rivojlanishining muhim bo‘g‘ini. Soha rivoji uchun mamlakatimizda keng ko‘lamli ishlarning amalga oshirilayotganligi bevosita jamiyat rivojini ta’minlaydi. Joriy yilning 26-may kuni o‘tkazilgan “O‘zbekiston – Rossiya oliy ta’lim muassasalari rektorlarining uchinchi mintaqalararo konferensiyasi” ham mamlakatimizda oliy ta’lim tizimini rivojlantirishga qaratilgan yirik loyihalardan biridir.Konferensiya qadimdan ilmu irfon maskani bo‘lgan Buxoro shahrida bo‘lib o‘tdi. Unda ikki davlat Prezidentlari administratsiyalari, Hukumat rahbarlari, O‘zbekiston Oliy va o‘rta maxsus ta’lim vaziri va Rossiya Federasiyasini Ta’lim va fan vaziri hamda Rossiyaning 20 dan ortiq nufuzli oliy ta’lim muassasalari rektorlari ishtirok etdi.Hududlararo konferensiyaning maqsadi O‘zbekiston va Rossiya o‘rtasida zamonaviy yo‘nalish va mutaxassisliklar bo‘yicha malakali kadrlar tayyorlash hamda ilmiy-tadqiqot sohasida o‘zaro hamkorlikni yangi bosqichga olib chiqishdan iborat.Erta tongdan Buxoroyi sharifning so‘lim go‘shalaridan biri – “Sahid Zarafshon” mehmonxonasi Respublikamiz hamda Rossiya Federatsiyasidan kelgan ko‘plab mehmonlarni qabul qildi. “O‘zbekiston – Rossiya universitetlari rektorlarining uchinchi mintaqalararo konferensiyasi” dasturiga muvofiq konferensiya ishtirokchilari ro‘yxatga olingach, Buxoro viloyat hokimi Zaripov Botir Komilovich bilan uchrashuv bo‘lib o‘tdi. Samimiy ruhda o‘tgan uchrashuvdan so‘ng, mehmonxonaning “Buxoro” yig‘ilishlar zalida ikki davlatning yuqori martabali davlat organlari vakillari – O‘zbekiston tomonidan Prezident maslahatchisi A.Abduvaxitov, Oliy va o‘rta maxsus ta’lim vaziri A.Toshqulov, Buxoro viloyati hokimi B.Zaripov; Rossiya tomonidan Prezident Xorijiy mamlakatlar bilan hududlararo va madaniy aloqalar bo‘yicha boshqarma boshlig‘ining o‘rinbosari A.Rыbakov, Fan va oliy ta’lim vazirining o‘rinbosari D.Afanasyev ishtirokida yalpi yig‘ilish bo‘lib o‘tdi. Uchrashuvda oliy ta’lim sohasidagi o‘zaro hamkorlikni rivojlantirish hamda dolzarb vazifa va masalalar muhokama qilindi. Shuningdek, tomonlarni qiziqtirgan ta’lim, ilm-fan va madaniyat bo‘yicha fikr almashinildi.Yangi kadr – yangi taraqqiyot asosi. Biz O‘zbekiston oliy ta’lim muassasalari bilan hamkorlikni davom ettirishga tayyormiz, - deydi Rossiya Federatsiyasi Fan va oliy ta’lim vazirining o‘rinbosari, Afanasyev Dmitriy Vladimirovich. Kunning ikkinchi yarmida konferensiya sho‘ba yig‘ilishlarida o‘z ishini davom ettirdi. Unga ko‘ra dasturda belgilangan quyidagi keng qamrovli mavzular qizg‘in muhokama qilindi. I. «Ish beruvchilar ehtiyojlariga muvofiq yuqori malakali kadrlar tayyorlash» sho‘basida «O‘zbekistonda Rossiya oliy ta’lim muassasalarining filiallarining faoliyatini qo‘llab-quvvatlash, kelajakdagi yangi filiallarning ochilishi va ularning faoliyatidagi dolzarb masalalar», «O‘zbekiston va Rossiya oliy ta’lim muassasalarining ilmiy sohadagi hamkorligi istiqbolli yo‘nalishlari, fanlar doirasida ikki darajali o‘quv va tarmoq dasturlarini yaratish va rejalarini ishlab chiqish»; II «Ilmiy-pedagogik xodimlar va iqtisodiyotning real sektoridagi korxona rahbarlari uchun malaka oshirish va qo‘shimcha kasb ta’limi dasturlarini tashkil etish” sho‘basida «Ilmiy-pedagogik xodimlarning malakasini oshirish va qo‘shimcha kasb-hunar ta’limi faoliyatini yaratish”, “Iqtisodiyotning real sektoridagi korxona xodimlarining malakasini oshirish va doimiy o‘qitish», «Rossiya universitetlari filiallari negizida rus tili kurslarini tashkil etish»ga doir masalalar, nixoyat, III «O‘zbekiston va Rossiya oliy ta’lim muassasalarining zamonaviy sharoitlardagi hamkorligining innovasion mexanizmlarini ishlab chiqish» sho‘basida «O‘zbekiston Respublikasi va Rossiya Federatsiyasi o‘rtasidagi ilmiy-tadqiqot va rivojlantirish sohasidagi hamkorlik», «Universitetlar o‘rtasida mavjud bo‘lgan ilmiy va texnikaviy almashinuv dasturlari», «Ilmiy-tadqiqot va rivojlantirish sohasidagi hamkorlikni kuchaytirish choralari».Bundan tashqari konferensiya yakunida o‘tkazilishi rejalashtirilgan keyingi Rossiya-O‘zbekiston ta’lim forumi kun tartibi bo‘yicha takliflar (Moskva, 2021 yil kuz oyi) muhokama qilindi. Konferensiya davomida ikki davlat rektorlari o‘zaro hamkorlikni yo‘lga qo‘yish barobarida dolzarb vazifa va masalalarni to‘g‘ridan-to‘g‘ri va ochiq muloqotda birgalikda muhokama qildilar. Shuningdek, Rossiyaning nufuzli oliy ta’lim muassasalari va respublikamizdagi oliy ta’lim muassasalari o‘rtasida malakali mutaxassislarni hamkorlikda tayyorlash maqsadida qo‘shma loyihalarni amalga oshirish bo‘yicha 15 dan ortiq shartnomalar imzolandi.O‘zbekistonda Rossiyaning mavjud 12 dan ortiq nufuzli oliy ta’lim muassasalari filiallari faoliyatini yanada kengaytirish va ko‘paytirish, birgalikda ilmiy va innovatsion forum hamda qo‘shma tadbirlarni o‘tkazish, ilmiy-tadqiqot bo‘yicha loyihalarni amalga oshirish va boshqa yo‘nalishlarda hamkorlikni kengaytirish borasida maqsadli rejalar belgilab olindi. Konferensiya yakuni bo‘yicha O‘zbekiston va Rossiya oliy ta’lim tizimidagi o‘zaro hamkorlik aloqalarini yanada kengaytirish va mustahkamlash bo‘yicha yakuniy rezolyutsiya qabul qilindi. BuxDU Matbuot xizmati
