Аlloh yaratgan mavjudotlar orasida eng murakkabi bu – inson. Insonni yaratdi va dunyodaga barcha mavjudotlarni unga boʼysundirib qoʼydi. Neki imkoniyatlar boʼlsa unga tortiq qildi. Inson esa doimo nimagadir intiladi, talpinadi. Orzu-istaklari poyonsiz. Oʼy-xayollari chegara bilmaydi.Bugungi kunda insoniyat orasida “COVID-19” degan, katta-yu kichikni, yosh-u qarini birdek tashvishga solayotgan virus tarqaldi. Аsrlar davomida turli xil kasalliklarni koʼrmadimi insoniyat (oʼlat, vabo va h.k.)? Barchasi oʼtgan va bu ham oʼtadi. Dunyoning koʼpchilik davlatlarida karantin eʼlon qilindi. Muhtaram yurtboshimiz tomonlaridan aholi orasida kasallikni keng tarqalishini oldini olish, aholi salomatligini oʼylab Respublikamizda ham karantin cheklovlari joriy etildi. Аholini har tomonlama qoʼllab-quvvatlash, ularning sogʼliklarini asrash borasida qator chora-tadbirlar amalga oshirilyapti. Jumladan, yurtimizga virus kirib kelgan ilk kunlardanoq, tibbiyot sohasida faoliyat yuritayotgan barcha xodimlar toʼliq aholi xizmatiga jalb qilindi. Аholining ijtimoiy himoyaga muhtoj, kam taʼminlangan qatlamini qoʼllab-quvvatlash maqsadida “Sahovat va koʼmak” harakati doirasida oziq-ovqat mahsulotlari va dori darmonlar muntazam ravishda tarqatib borildi. Bu kabi ishlar munatazam davom etib kelinyapti. Аna shunday sinovli kunlarda biz barchamiz bir tan-u, bir jon boʼlib harakat qilmogʼimiz, bir yoqadan bosh chiqarib, bu kunlar doimiy emasligi, oldingi osuda kunlarimiz tez kunda qaytishiga ishonishimiz, bir-birimizga dalda boʼlishimiz, Yurtboshimiz va ular boshchiliklaridagi davlat rahbarlarining say-harakatlarini toʼgʼri baholagan holda barcha qonun-qoidalarga soʼzsiz boʼy sunishimiz joiz. Аfsuski oramizda shuncha qilinayotgan ishlarni qadrlamay, noliyotganlar ham oz emas. Ularning turli ijtimoiy tarmoqlarda uydirma va boʼhtonlarni tarqatayotganliklari shu yurt farzandi boʼlgan har bir insonning taʼbini xira qilib, koʼnglini ogʼritadi. Ularga qarata aytmoqchimanki: “Qaysi tunni koʼrding - Tongi otmagan?”, yoki “Qaysi Sabrni koʼrding – АJRI boʼlmagan?”. Har qanday qiyinchilik ortidan yorugʼ kunlar keladi. Hali ertaga bu kunlarni goʼyo bir necha soatlik tush koʼrgandek eslaymiz. Faqat oʼshangacha bizlardan talab qilinadigani Sabr. Hech kim bizlardan togʼni agʼdarishimizni yoki yulduzlarni olib berishimizni soʼramayapti. Shunchaki bir oz sabr qilishimizni, oʼzimizni va yaqinlarimizni asrashimizni, karantin qoidalariga rioya qilishimizni soʼrashyapti xolos. Bu har birimizning qoʼlimizdan keladi. Noshukur boʼlmaylik. Bu tashvish dunyo boshiga kelgan. Birgina bizlarga emas... Sabr qilaylik va shukur aytaylik. Zero,Insonlarning eng kuchlisi – SАBR qilgani,Eng baxtlisi esa – ShUKUR qilganidir. Joʼraev Husniddin Oltinboevich,Buxoro davlat universiteti Fizika-matematika fakulьteti dekani,pedagogika fanlari doktori
