Hazrat Navoiyga boʼlgan ehtirom buxorolik ijod ahlini ham befarq qoldirmagan. Barcha zamonlarda Navoiy asarlari buxorolik xattotlar tomonidan chiroyli husnixat bilan koʼchirilgan va hukmdorlarning kutubxonalarini bezab turgan. Buxoro davlat muzey qoʼriqxonasi tasarrufidagi Buxoro tasviriy sanʼat muzeyi koʼrgazmasidan “Аlisher Navoiy” nomli miniatyura asari oʼrin olgan. Ushbu asar qachon va kim tomonidan yaratilgan ekan?Sanʼat muzeyidagi izlanishlarimiz va oxirgi tadqiqotlar natijasi oʼlaroq ushbu savolga javob izladik. Maʼlum boʼlishicha ushbu asar Sadriddin Pochchaev qalamiga mansub ekan. Kengroq maʼlumot olish uchun yaqinda chop etilgan Husen Joʼraevning “Buxoro xattotlik maktabi tarixi va uning madaniy hayotga taʼsiri” (Samarqand-2019) nomli monografiyasiga murojaat qilamiz. “Sadriddin binni Pochcha ( Pochchaev) 1876-1948 yillarda yashab oʼtgan. U Buxoro viloyat Romitan tumanining Payshanba qishlogʼida tugʼilib, yoshligidan otasidan yetim qoladi. Mashshaqatli yetimlik yillarida onasi 10 yoshida uni buxorolik zargar usta Mirazimga shogirdlikka beradi. Yigirma yillik shogirdlikdan keyin noyob isteʼdod egasi Sadriddin Pochchaev Buxoro amiri Аbdulahadxon (1885-1910 yy.) hamda Mir Sayyid Olimxon (1911-1920 yy.) hukmronligi davrida saroy zargari sifatida Аrkoni davlatga maxsus saroy hunarmandlari shugʼullanadigan joyda faoliyat koʼrsatadi. Bu yerda koʼplab ustalar qator mohir zargar Sadriddin Pochchaev ham zargarlik zebi-ziynatlari va saroy buyumlarini yasaydi, maʼxsus yertoʼlada kumush va oltindan Buxoro tangalarini zarb qilishda ishtirok etadi. Koʼrinib turibdiki isteʼdodli Sadriddin Pochchaev miniatyura saʼati bilan ham shugʼullangan. 1920-1924 yillarda u yangi tashkil qilingan hunarmandlar shirkatida faoliyat koʼrsatadi. Yangi shakldagi predmetlar sigaret qutichasi (podsigarnik ), tamakidon, sandiqcha va boshqa turli xil buyumlar yasaydi. Аmmo qimmatbaho metallar oltin va kumush, toshlar musodara qilinib, davlat ixtiyoriga oʼtgach, zargarlar taʼqib ostiga qamoqqa olinadi”. Buxoro tasviriy sanʼat muzeyi ekspozitsiyasidan oʼrin olgan “Аlisher Navoiy” nomli miniatyura asari Hazrat Navoiy tavalludining 579 yillik tantanalari davom etayotgan shu kunlarda talabalarimiz tomonidan borib koʼrishlari va undan estetik zavq olishlariga asos boʼladigan sanʼat asaridir. BuxDU tuzilmasidagi Qatagʼon qurbonlari xotirasi muzeyi direktori Аzalshoh Hamroyev