Buxoro davlat universiteti hamda G`ijduvon tuman Xalq taʼlimi boʼlimining tashabbusi bilan 4-dekabr kuni G`ijduvon tumani 30-umumiy oʼrta taʼlim maktabida tuman maktablari 9-10 sinf oʼquvchilari oʼrtasida kimyo fani olimpiadasi boʼlib oʼtdi. Mazkur olimpiadani 30-maktab direktori A. Malikov kirish soʼzi bilan ochib, barcha ishtirokchilarga omad tiladi. Bugungi kunda xalq ta`limi va oliy taʼlim tizimida prezidentimiz tashabbuslari olib borilayotgan islohotlar hamda iqtidorli yoshlar bilan ishlash boʼyicha keng koʼlamli tadbirlarga alohida toʼxtalib oʼtdi. Soʼngra olimpiada ishtirokchilarini Buxoro davlat universiteti Tabiiy fanlar fakulteti Kimyo kafedrasi mudiri, k.f.n., dots. H.T. Avezov, G`ijduvon tumani XTB TSM inspektor metodisti F.Jo`rayeva qutlab, ularning olimpiada jarayonida faol qatnashishida omad tilashdi. Mazkur olimpiada Oʼzbekiston Respublikasi Prezidentining 2019 yil 3-maydagi “Iqtidorli yoshlarni aniqlash va yuqori malakali kadrlar tayyorlashning uzluksiz tizimini tashkil etish chora-tadbirlari toʼgʼrisida”gi PQ-4306-sonli qarori va Oʼzbekiston Respublikasi Prezidenti Аdminstratsiyasining 2019 yil 11-oktabrdagi topshirigʼi ijrosini taʼminlash boʼyicha oʼtkazilgan yangicha tashkil etilgan sinov tanlovidir. Ushbu olimpiadani oʼtkazishdan koʼzlangan asosiy maqsad G`ijduvon tumani oʼquvchi yoshlari o`rtasida iqtidorli yoshlarni aniqlash, ularning intellektual salohiyatini qoʼllab-quvvatlash, ragʼbatlantirish va kimyoviy bilimlarini oshirish, jahon taʼlim sohasida yanada integratsiyalashuvi uchun qoʼshimcha shart-sharoitlar yaratish hamda oʼquvchilarga kimyo fanidan oʼtkaziladigan xalqaro va Respublika olimpiadalari haqida batafsil maʼlumot berishdan iboratdir. Oʼtkazilgan kimyo olimpiadasida tumanning 65 ta umumtaʼlim maktabi, 4 ta IDUM hamda 1 ta ixtisoslashtirilgan maktablardan jami 153 dan ortiq 9-10-sinf oʼquvchilari ishtirok etib, oʼz bilim va mahoratlarini sinovdan oʼtkazdilar.Olimpiada shartiga koʼra sinovlar ikki bosqichda o`tkazildi. Oʼquvchilari uchun tayyorlangan topshiriqlar murakkabligiga koʼra xalqaro olimpiada topshiriqlari doirasida tuzilgan boʼlib, birinchi bosqichda 3 ta masala hamda 1 ta sintez berildi, uni yechish uchun 2 soat vaqt belgilandi. Ikkinchi bosqichda esa 30 ta test savoli bo`lib unga 1 soat vaqt ajratildi.Olimpiadani yuqori saviyada, xalqaro standartlar darajasida oʼtkazish maqsadida hakamlar hayʼatiga Kimyo kafedrasi mudiri, k.f.n., dotsent H.T. Avezov, yosh olimpiadachi talabalar jamoasining ilmiy maslahatchilari t.f.n., dots. S.I. Nazarov va t.f.n., dots. M.S. Sharipovlar, Buxoro davlat universiteti Kimyo kafedrasidan yevropaning bir necha yetakchi oliy taʼlim muassasalarida malaka oshirib kelgan yosh o`qituvchi B.B. Olimov hamda Kimyo ta`lim yo`nalishi 2-bosqich magistranti Karomatov Sardor jalb qilingan. Yordamchi ishchi guruh tarkibiga tuman XTB xodimlari bilan bir qatorda tumanning ko`zga ko`ringan kimyo o`qituvchilari kiritildi. B.B. Olimov va S.I. Nazarovlar esa oʼtkazilgan olimpiada masalalari yechimlarini taqdimot qildilar. Olimpiada yakunlariga koʼra, har bir sinf doirasida birinchi, ikkinchi va uchinchi oʼrinlar gʼoliblari Buxoro davlat universiteti rektori O.X. Xamidov imzosi bilan tasdiqlangan I-darajali, II-darajali, III-darajali diplomlar bilan taqdirlandilar.Olimpiada gʼoliblari:9-sinflar boʼyicha:1-oʼrin: Safarov Dilshod (37-maktab), I-darajali diplom sohibi;2-oʼrin: Nasimov Sayfullo (15-maktab), II-darajali diplom sohibi;2-oʼrin: Avloberdiyev Bexruz (33-maktab), II-darajali diplom sohibi;3-oʼrin: Hikmatullayev Farhod (49-maktab), III-darajali diplom sohibi.9-sinflar orasida 2 ta 2-o`rin sohiblari aniqlandi ular bir xil ball to`plashdi. Takroriy sinovdan keyin ham ular bir xil natijalarni namoyon qilishdi. So`ngra hakamlar hay`ati bir ovozdan ikkalasiga ham II darjali diplom bilan taqdirlashga qaror qilishdi.10-sinflar boʼyicha:1-oʼrin: Qo`chqorov Ahmadjon (25-maktab), I-darajali diplom sohibi;2-oʼrin: Saidov Xurshid (20-maktab), II-darajali diplom sohibi;3-oʼrin: Safoqulova Ozoda (30-maktab), III-darajali diplom sohibi. I-darajali diplom sohiblari Safarov Dilshod va Qo`chqorov Ahmadjonlarga Kimyo kafedrasi jamoasi nomidan ingliz va rus tillarida nashr qilingan “Xalqaro olimpiada masalalarini yechish boʼyicha tavsiyalar” kitobi maxsus sovgʼa sifatida topshirildi.G`ijduvon tumani 9-sinf oʼquvchisi Safarov Dilshod tanlov natijalari boʼyicha 9-10 sinf oʼquvchilari orasida eng yuqori ball toʼplab, Buxoro davlat universitetida tashkil etiladigan oʼquvchilarni kimyo boʼyicha Xalqaro va Respublika fan olimpiadalariga tayyorlash boʼyicha “Yosh olimpiadachilar” yozgi maktabida bepul taʼlim olish huquqini qoʼlga kiritdi. Olimpiada gʼoliblariga diplomlarni S.I. Nazarov va B.B. Olimovlar topshirdilar. Olimpiadaning taqdirlash va yopilish marosimida Buxoro viloyati G`ijduvon tuman oʼquvchi yoshlari oʼrtasida oʼtkazilgan “Buxoro kimyo olimpiadasi”ni tashkil qilish, xalq taʼlimi tizimida taʼlim sifatini yaxshilash, iqtidorli yoshlarni aniqlash va qoʼllab quvvatlash ishlaridagi hamkorligi uchun Buxoro davlat universiteti rektori Xamidov Obidjon Xafizovichga va Kimyo kafedrasi jamoasiga G`ijduvon tuman XTB rahbariyati tashakkur bildirdi.
