Har tong davlatimiz madhiyasi sadolari ostida yangi kunni kutib olar ekanmiz, koʼz oldimizda goʼzal manzara namoyon boʼladi. Uning har bir chuqur maʼnoga ega satri, mardonavor va sohir ohangi bizni sehrlab qoʼyadi, qalbimizda Vatanimizdan faxrlanish, bugunimizdan shukronalik va ertamizga ulkan ishonch hissini joʼsh urdiradi. Davlat ramzlari mamlakatimiz suvereniteti va mustaqilligini ifodalovchi, xalqimizning shaʼnu shavkati, gʼururi, or-nomusi, tarixiy xotirasi va orzu-umidlarini oʼzida mujassam etuvchi muqaddas timsollardir.Shu bois Birinchi Prezidentimiz Islom Karimov tashabbusi bilan mustaqillikning ilk kunlaridan xalqimizning ozodlik, hurlik singari eng buyuk orzu-intilishlarini, maʼnaviy qadriyatlarini ifodalovchi, Vatanimiz mustaqilligini mustahkamlash, yurtga sadoqat, bunyodkorlik va yaratuvchanlikka undovchi Bosh qoʼshiqni qabul qilishga asosiy eʼtibor qaratildi. 1992 yil 10 dekabrda “Oʼzbekiston Respublikasining Davlat madhiyasi toʼgʼrisida”gi qonun imzolandi.Oʼzbekiston Qahramoni, xalq shoiri Аbdulla Oripov sheʼri, Oʼzbekiston xalq artisti, atoqli kompozitor Mutal Burhonov musiqasi asosida yaratilgan madhiyamizda musaffo osmonimiz, baxtli va farovon hayotimiz, xalqimizning asriy orzulari, kelajakka yorugʼ umidi va mustahkam ishonchi teran ifodalangan. Xa, xalqimiz omon ekan mustaqil mamlakatimiz yuksak taraqqiyot, buyuk kelajak barpo etish sari odimlashda davom etadi, ulugʼ xalqning mangu qoʼshigʼi – madhiyamiz xalqimiz, farzandlarimiz qalbidan chuqur joy olib, olam uzra baralla yangrayveradi.Shu munosabat bilan Buxoro shahridagi Abu Ali Ibn Sino nomidagi favvoralar maydonida O'zbekiston Respublikasi Davlat Madhiyasi qabul qilinganligining 27 yilligi munosabati bilan bayram tadbiri uyushtirildi. Viloyat hokimining yoshlar siyosati, ijtimoiy rivojlantirish va ma'naviy-ma'rifiy ishlar bo`yicha o`rinbosari J.Sh. Nosirov bayram tadbirini ochib berdi. Ushbu bayram tadbirida Buxoro davlat universiteti professor-o'qituvchilari, talabalari faol ishtirok etishdi. Davlatimiz madhiyasi ona Vatanimizdan gʼururlanishga, mustaqilligimizni mustahkamlashga, bugunimizning qadriga yetishga, yangi marralarni zabt etishga undayveradi. Universitet talabalari tomonidan Oʼzbekiston Respublikasi Davlat madhiyasi ijro etildi. Buxoro davlat universiteti Matbuot kotibi Otabek Jalolov
