2019-yilning 11-dekabr kuni Buxoro davlat universiteti hamda Rossiya Federatsiyasining Ural federal universiteti uchun tarixiy ahamiyatga ega kun boʼlib qoladi. Sababi shu kuni Ural federal universiteti prorektori Dmitriy Vitalyevich Bugrov yurtimizga amalga oshirgan safari doirasida Buxoro davlat universitetida ham boʼldi.Oʼzbekiston va Rossiya federatsiyasi, ikki davlat oʼrtasidagi doʼstlik yildan yilga rivojlanib, turli sohalarda hamkorlik aloqalari kengayib bormoqda. Mazkur aloqalarning natijasini oliy taʼlim sohasidagi kelishuvlar misolida ham koʼrish mumkin. Oʼtgan qisqa vaqt davomida Buxoro davlat universiteti Rossiya federatsiyasining koʼpgina taʼlim muassasalari va nufuzli tashkilotlari bilan turli kelishuvlarni amalga oshirdi. BuxDU rahbariyati ishtirokida oʼtgan muzokaralarda oʼzaro hamkorlikda teng manfaatli ilmiy tadqiqot ishlarini olib borish, xalqaro ilmiy-nazariy anjumanlarda ishtirok etish, zamonaviy oʼqitish talablariga javob beradigan taʼlim dasturlarini birgalikda qayta ishlash kabi muhim masalalar oʼrtaga tashlandi. Ma'lumot sifatida shuni aytish mumkinki, Ural federal universiteti TIMES-2020 reytingida 1001+ guruhida, QS reytingida 364-oʼrinda turadi. QS ning Sharqiy Yevropa va Markaziy Osiyo reytingida 43-oʼrin, BRIKS mamlakatlari reytingida 58-oʼrinda turadi. QS-2018 ning sohalar boʼyicha reytingida matematika, mexanik muhandislik, fizika va astronomiya boʼyicha yuqori oʼrinlarda turadi. Rossiya federatsiyasidan tashrif buyurgan delegatsiyani Buxoro davlat universiteti rektori O.X. Xamidov kutib olib ular bilan yaqindan suhbatlashdi. Shuningdek, BuxDU professor-o'qituvchilari hamda faol talaba yoshlari ishtirokida universitet kichik faollar yig'ingohida BuxDU hamda Ural federal universiteti o'rtasida hamkorlik memorandumi imzolandi. Har ikki tomon istiqboldagi hamkorlikka katta ishonch bildirib, teng manfaatli sherikchilik munosabatlari mustahkamlanib borishiga ishonch bildirdilar. Oliy oʼquv yurtlari oʼrtasida taʼlim sohasidagi hamkorlikning asosiy jihatlari, talabalar va oʼqituvchilarning ilmiy almashinuvi, yuqori malakali xodimlarni tayyorlashda hamkorlik qilish borasidagi ishlar muhokama qilindi. Ikki tomon uchun manfaatli kechgan uchrashuv soʼngida mehmonlarga estalik sovgʼalari rektorimiz Obidjon Xafizovich tomonidan ulashildi. Mehmonlar shuningdek Buxoro davlat universiteti qo'shma ta'lim dasturlari asosida ochilgan yangi yo'nalishlar bilan tanishdilar va BuxDU muzeyi, Yapon markaziga ham tashrif buyurishdi. Buxoro davlat universiteti Matbuot kotibi Otabek Jalolov