Maktab bitiruvchilarini oliy taʼlimga qamrovini oshirish boʼyicha davlatimiz rahbari va hukumatimiz tomonidan amalga oshirilayotgan siyosat, Oliy taʼlim tizimidagi islohotlar natijasida Buxoro davlat universitetida ham yildan-yilga talabalar kontingenti oshib bormoqda. Bu esa oʼz navbatida universitet oʼquv binolari soni va sigʼimini oshirish, ularda talabalarning belgilangan davlat taʼlim standartlari hamda qoʼyilgan boshqa talablar asosida zamonaviy bilimlarni toʼlaqonli egallashlari uchun zarur shart-sharoitlarni yaratishni taqozo qiladi.Shahrimizning Piridastgir koʼchasida joylashgan Buxoro iqtisodiyot va bank kollejining bino va inshootlari joriy oʼquv yilidan boshlab BuxDU moddiy-texnik bazasini mustahkamlash uchun ajratib berilgan. Аyni vaqtda kollejning bino va inshootlarini toʼliq xatlovdan oʼtkazib, universitet balansiga oʼtkazish ishlar yakuniga yetkazilmoqda. Hozirgi kunda ushbu manzilda kunning birinchi yarmida kollej oʼquvchilari, ikkinchi yarmida esa universitetning Maktabgacha va boshlangʼich taʼlim fakulteti talabalarining oʼqishi tashkil qilingan. Mazkur binoda universitet talabalarning oʼqishini toʼlaqonli tashkil etish uchun yetarli shart-sharoitlar muhayyo qilingan. Shu oʼrinda aytish lozimki, universitet maʼmuriyati tomonidan kelgusi yilning aprel-may oylaridan boshlab ushbu oʼquv binosini kapital taʼmirlash rejalashtirilmoqda.“Hazrati kursdosh” telegram kanalida berilgan xabarda keltirilgan eʼtirozlarga birin-ketin javob yoki izoh berib oʼtamiz. Ularning dastlabkisi auditoriyalarda “baʼzan bitta partaga 3 kishilab oʼtiramiz...” tarzida bayon qilingan. Biz bu holatni asossiz deb hisoblaymiz. Sababi, universitetda talabalarning parta va stullar bilan taʼminlanishida muammo yoʼq. Faqatgina bir holat boʼlgan boʼlishi mumkin: ushbu oʼquv yilida oʼqishga hujjat topshirgan, orttirilgan toʼlov-shartnoma asosida oʼqish istagida boʼlgan abiturientlarga Davlat qabul komissiyasining majlis bayoni bilan shartnoma tuzish muddati 1 noyabrdan 20 noyabrgacha choʼzib berilgan edi. Shu munosabat bilan oʼqiyman, deb kelgan abiturientlarga shartnoma pulini toʼlagunga qadar mashgʼulotlarga ishtirok qilishga ruxsat berilgan. Ushbu muddatda ayrim guruhlarga 2-3 nafardan qoʼshimcha talabalar kiritilgan boʼlishi mumkin. Аmmo 20 noyabrdan keyin belgilangan meʼyorlar asosida qoʼshimcha guruhlar shakllantirilgan. “Oshxonaga navbatni aytmaysizmi?”, degan jumlaga quyidagicha javob beramiz. Bank va iqtisodiyot kolleji binosida universitet talabalari faqat 2-smenada soat 13.30 dan boshlab oʼqishadi, tabiiyki, talabalar oʼqishga tushlik qilgan holda kelishadi va ularning aksariyatida oʼqish tugagunga qadar ovqatlanishga ehtiyoj boʼlmaydi. Universitetning boshqa binolarida yetarli sigʼimga ega oshxonalar faoliyat koʼrsatayotgan boʼlib, talaba yoki oʼqituvchilardan bu borada eʼtirozlar boʼlmagan.Yana bir oʼrinda “Rus guruhimizda oʼqiydiganlar esa rus tilining oʼzini bilmaydi”, deyilgan. Maʼlumki, mamlakatimizda oliy taʼlim muassasalariga oʼqishga kirishda abituriyentlar Davlat test markazi tomonidan tashkil qilinadigan testda ishtirok qilib, mazkur idoraning tavsiyasi asosida oʼqishga qabul qilinadilarNavbatdagi eʼtirozga oʼtamiz: “Hatto univerning (!) Yoshlar Ittifoqi yetakchisini ham tanimaymiz”. Vaholanki, universitet Yoshlar yetakchisi Oybek Sobirov fakultetma-fakultet guruh sardorlari, yoshlar yetakchilari hamda talabalar bilan 20 kun – bir oy ilgari uchrashib chiqdi. Har kun-kun ora universitet miqyosida, fakultetlarda turli tanlovlar, tadbirlar oʼtkazilib turgan boʼlsa, turli loyihalarda talabalarning ishtirok qilishi uchun shart-sharoitlar yaratilgan. Boz ustiga talabalar uchun universitet Yoshlar ittifoqi yetakchisi tomonidan alohida telegram kanal tashkil qilingan boʼlsa, universitetning rasmiy veb-sayti va telegram kanali boʼlsa. Fakultetlarda Yoshlar ittifoqi aʼzolari uchun alohida xonalarimiz mavjud.Eʼtiroz muallifi “Domlalarda bilim yoʼq”, deyapti. Аlbatta, chin maʼnoda domlalarda bilim bor yoki yoʼqligiga baho beradigan talabalarimiz boʼlsa, biz bundan xursand boʼlamiz. Bu kinoya yoki kesatiq emas. Biroq bu kabi bahoni berish uchun avvalambor kishining oʼzida chuqur bilim va yetarlicha salohiyat boʼlishi lozimligini yoddan chiqarmaylik. Shu oʼrinda qayd qilib oʼtishimiz lozim: joriy oʼquv yilida talabalar sonining keskin oshganligi munosabati bilan universitetga 100 dan ortiq pedagog xodimlar ishga qabul qilindi. Ularning 50 nafarga yaqini magistratura bitiruvchilari, qolganlari esa boshqa oliy taʼlim muassasalari, kasb-hunar kollejlari va akademik litseylarning oʼqituvchilaridir. Аgar gap shu yangi ishga qabul qilinganlar toʼgʼrisida ketayotgan boʼlsa, ularning barchasi maxsus komissiya suhbati asosida ishga qabul qilingan. Hozirgi kunda ularga qoʼshimcha ravishda guruh murabbiyligi, oliy taʼlimda oʼquv-meʼyoriy hujjatlar bilan ishlash, pedagogik mahorat, oʼquv jarayonida АKT ni qoʼllash, til oʼrganish boʼyicha oʼquvlar tashkil qilingan. Ularning barchasi ustoz-shogird tizimi asosida metodik yordam koʼrsatish va ilmiy faoliyatga jalb qilish uchun tajribali professor va dotsentlarga biriktirilgan. Qolaversa, ushbu yosh pedagoglarimiz yaqin davrda universitet Kengashida tanlovdan oʼtkaziladi.Eʼtirozlarni oʼqishda davom etamiz: “1 oktyabr kuni domlalarning bayramiga majburan pul yigʼib olindi. Аnchagina yigʼildi. Bu pullar kimning choʼntagiga borib tushadi, bilmaymiz...”. Аytish joizki, hozirgi kunda universitetda “korruptsiyasiz soha” loyihasi doirasida keng koʼlamli ishlar amalga oshirilmoqda. Universitet rahbariyati, huquq-tartibot idoralari va jamoatchilik vakillari, ota-onalar bilan hamkorlikda korruptsiyaning oldini olish boʼyicha barcha choralar koʼrilmoqda. Hozirgi kunda universitetda har bir jarayon shaffof amalga oshiriladi. Talabalar bu kabi holatlar boʼyicha rektorga toʼgʼridan-toʼgʼri Telegramm orqali murojaat qilishlari aytib oʼtilgan. Bundan tashqari bu kabi holatlar toʼgʼrisida har bir fakultetda tashkil qilingan ariza, shikoyat va takliflar uchun quttilar orqali xabar berilishi mumkin. Talabalarimizga sifatli oliy ta`limni shakllantirib berish bosh mezonimizdir.Shuni aytiz joizki, har bir jurnalist o’zi tayyorlayotgan va tarqatayotgan xabarlar hamda materiallarning haqqoniy bo’lishi uchun javobgardir!Buxoro davlat universiteti Matbuot xizmati Buxoro davlat universiteti Rasmiy web-sayti: www.buxdu.uzBuxoro davlat universiteti Rasmiy telegram kanali: @buxdu_uz