Oʼzbek tilshunosligi kafedrasi aʼzolari S.А. Nazarova, N.K. Rahimova va M.Yu. Hojieva BuxDU otaliqqa olgan Gʼijduvon tumanidagi 43-umumiy oʼrta taʼlim maktabida oʼquv-metodik, maʼnaviy-maʼrifiy va tarbiyaviy ishlar holatini oʼrganishdi. Universitet va oʼrta maktab hamkorligini kuchaytirish maqsadida oʼquvchilar bilimini DTS va xalqaro baholash dasturlari talablari asosida rivojlantirish, bitiruvchilarning oliy taʼlim muassasalariga kirishi va oliy malakali mutaxassis boʼlib yetishi, shuningdek, milliy mafkuraviy dunyoqarashini tarbiyalashga qaratilgan suhbat, mahorat darsi va seminar oʼtkazildi.Kafedra dotsenti S.А. Nazarova bitiruvchi sinf oʼquvchilari bilan muloqotda ularning iqtidori, ijodkorligi haqida iliq fikrlar bildirib, oʼziga boʼlgan ishonchini orttirdi. Inson hayotda oʼz oʼrnini topishi uchun yaxshi bilim olishi va, albatta, oliy taʼlim muassasalarida oʼqishni davom ettirishi zarurligini taʼkidladi.Kafedra oʼqituvchisi N.K. Raximova tomonidan ingliz tili darsida oʼquvchilarning tilni oʼrganishga qiziqishi, lugʼat boyligini oshirishga qaratilgan mahorat darsi oʼtildi. Mahorat darsida tilni oʼrganish motivatsiyasini oshirishga erishish usullari koʼrsatildi. Seminarda oʼquvchilar bilimini oshirish, ularni xalqaro baholash standartlari, “PISA” va “PIRLS” dasturlari talablari boʼyicha tayyorlash, dars maqsadlariga erishish natijadorligi, oʼqitish va oʼzlashtirish sifatini yaxshilashga doir masalalar haqida fikr yuritildi. Shuningdek, Oʼzbekiston Respublikasi Davlat bayrogʼi tasdiqlangan kunning 28 yilligini nishonlash maqsadida oʼtkazilgan “Bayrogʼimiz − faxru gʼururimiz” mavzusidagi seminarda M.Yu.Hojieva tomonidan davlat bayrogʼi oʼzbek xalqining shon-sharafi, tarixiy xotirasi va intilishlarini oʼzida mujassam etib, tinch va osoyishta, ozod va erkin hayot, yorugʼ kelajakka ishonch timsoli ekanligi tushuntirildi.
