Kecha o‘zaro hamkorlik, o‘rganish va tajriba almashish maqsadida BuxDUga tashrif buyurgan Toshkent davlat iqtisodiyot universiteti rektori boshchiligidagi professor-o‘qituvchilar universitetda ishchi seminar tashkil etdilar.Seminarda Buxoro davlat universitetining prorektorlari, dekanlar, bo‘lim boshliqlari, kafedra mudirlari qatnashdilar. Tadbirni BuxDU rektori Obidjon Xamidov ocharkan Prezidentimiz Sh.M.Mirziyoyev rahbarligida oliy ta’lim tizimini tubdan isloh qilish bo‘yicha ulkan ishlar amalga oshirilayotganini alohida ta’kidladi. Ushbu sa’yi-harakatlar, avvalo, har bir oliy ta’lim muassasasi tomonidan xorijdagi yetakchi turdosh ilmiy ta’lim muassasalari bilan istiqbolli hamkorlik aloqalarini yo‘lga qo‘yish, o‘quv jarayoniga xalqaro ta’lim standartlariga asoslangan eng zamonaviy pedagogik texnalogiyalar, ta’lim dasturlari va o‘quv-metodik materiallarni keng joriy etish maqsadlarini ko‘zlaydi. Toshkent davlat iqtisodiyot universitetidan kelgan professor-o‘qituvchilar bizga ana shu ezgu ishlarni ro‘yobga chiqarishga ko‘maklashish uchun BuxDUda bo‘lib turishibdi, – dedi rektor.Shundan so‘ng ishchi guruh seminari boshlandi.Toshkent davlat iqtisodiyot universitetining dotsenti, iqtisod fanlari nomzodi M.Yusupov maktabgacha va boshlang‘ich ta’lim fakultetining faoliyatini o‘rganish natijalarini videoslayd orqali taqdimot qildi.Iqtisod fanlari nomzodi, dotsent I.Hatamov maktabgacha ta’lim kafedrasi faoliyatiga to‘xtalib, bu yerda asosan ilmiy salohiyatni oshirish, kafedra bilan ishlab chiqarish o‘rtasida mustahkam aloqalarni yo‘lga qo‘yishni, shuningdek o‘quv uslubiy sohadagi muammolar, ularning yechimlari borasida takliflar ham bildirdi.Toshkent davlat iqtisodiyot universitetining Yoshlar bilan ishlash, ma’naviyat va ma’rifat bo‘limi boshlig‘i A.Amonov ham fakultetda ma’naviy-ma’rifiy yo‘nalishdagi ishlar talab darajasida emasligiga e’tibor qaratdi. Ushbu yo‘nalishda Toshkent davlat iqtisodiyot universitetida amalga oshirilayotgan ishlar to‘g‘risida gapirib, yangi loyihalardan foydalanishi borasida takliflar berdi.Sifat komissiyasi a’zosi TDIU professori O.Abduvahobov esa o‘z ma’ruzasida Bitiruv malakaviy ishlar va magistrlik dissertatsiyalarining mavzularini tasdiqlashdagi ayrim juz’iy kamchiliklarni bartaraf etish haqida gapirdi va bu borada o‘zining tavsiyalari bilan o`rtoqlashdi.Seminar so‘ngida universitet professor-o‘qituvchilari ham ma’ruzalar yuzasidan o‘z fikr-mulohazalari va takliflarini bildirishdi.Mannon OtaboyBuxDU matbuot kotibi
