Polshaning Chestoxove shahrida bo‘lib o‘tayotgan “SMART SOCIETY 2019“ Xalqaro ilmiy kongressi tashkiliy qo‘mitasi taklifiga asosan, Jismoniy madaniyat fakulteti dekani B.Ma’murov kongressda universitet nomidan ishtirok etmoqda. Dunyoning 13 ta davlati vakillari qatnashayotgan mazkur nufuzli kongress doirasida Polshaning Poloniya universiteti hamda BuxDU o‘rtasida hamkorlik shartnomasi tuzildi. Poloniya universiteti tomonidan mazkur shartnoma rektor Andjey Krinski tomonidan imzolandi. Shartnomaga asosan talabalarning akademik almashinuvini yo‘lga qo‘yish, fan, madaniyat va ta’lim sohasida birgalikdagi tadbirlarni o‘tkazish, bakalavriat, magistratura va doktorantura dasturlari bo‘yicha qo‘shma ta’lim dasturlarini bajarish nazarda tutilgan. Polshalik mutaxassislar O‘zbekiston, xususan Buxoro davlat universitetining oliy ta’lim sohasiga katta qiziqish bildirib, joriy yilda BuxDU faoliyati bilan bevosita tanishish va universitetda polyak tilini o‘rgatish markazini ochish masalasini muhokama qilish niyatida ekanliklarini ma’lum qilishgan. Yuqoridagilar bilan bir qatorda, kongress davomida Ukraina va Latviya OTMlari bilan ham hamkorlik kelishuvlarini tuzish bo‘yicha muzokaralar olib borilmoqda.Mannon OtaboyBuxDU matbuot kotibi
