28.04.2026

Buxoro davlat universiteti Tabiiy fanlar va agrobiotexnologiya fakultetida talaba-yoshlarning zamonaviy bilimlarini oshirish, ularni turli tahdidlardan ogoh etish maqsadida ma’naviy-ma’rifiy tadbir tashkil etildi.

Tabiiy va agrobiotexnologiya fakultetining 2-1-Kim-25 va 2-2-Kim-25 guruh talabalari ishtirokida “Sun’iy intellektning zulmatli tomoni” mavzusida davra suhbati o‘tkazildi. Tadbir davomida sun’iy intellekt texnologiyalarining salbiy jihatlari, xususan, yolg‘on axborotlar tarqalishi, kiberfiribgarlik va shaxsiy ma’lumotlar bilan bog‘liq xavflar haqida atroflicha ma’lumot berildi.

Shuningdek, Kiberxavfsizlik doirasida axborot xavfsizligi tushunchasi keng yoritilib, ma’lumotlarni himoya qilish, kuchli parollar yaratish, shaxsiy ma’lumotlarni oshkor etmaslik hamda turli zararli havolalardan ehtiyot bo‘lish bo‘yicha amaliy tavsiyalar berildi.

Tadbir jarayonida iqtisodiy jinoyatlarga qarshi kurashish mavzusida savol-javoblar o‘tkazilib, talabalar o‘zlarini qiziqtirgan savollarga batafsil javob oldilar. Uchrashuv davomida yoshlarni halollik, qonunlarga hurmat va sog‘lom dunyoqarash ruhida tarbiyalash muhimligi alohida ta’kidlandi.

Mazkur davra suhbati talabalarning nafaqat axborot xavfsizligi, balki iqtisodiy va huquqiy savodxonligini oshirishga xizmat qildi.