Welcome to buxdu   Click to listen highlighted text! Welcome to buxdu Powered By GSpeech

Yaxshi odamlar

Yaxshi odamlar.BDU-Buxoro davlat universiteti

Ular borligidan go’zaldir olam ,

Sadag’asi ketsang arzir batamom.

Qilgan amalimi yo so’zi malham,

Shular borda yashar INSON degan nom.

 

Halol mehnatidan oboddir vatan,

Kechalar osuda ,tonglar nurafshon.

Ezgu maqsad sari bir jon va bir tan,

Yaxshilik ko’rkidir, tumordir iymon.

 

Ularning qalbida sahovat bisyor,

Muhabbat barq urar aytgan so’zida .

Hatto chumoliga bermaslar ozor,

Mehr daryosi bor ikki ko’zida.

 

Shodmiz qalb bog’ida gul unaversin,

Goh alam sachratar bosgan qadamlar.

Taqdir yo’llarimiz tutashaversin,

Boringizga shukr …Yaxshi odamlar!!!

 

 

 

 

                                                                                                                   Rahmatulla Temirov.

                                            

 

 

Ona…

Dunyo tashvishlari unutib bir zum,

Kel do’stim o’zlikni anglab olaylik.

Yoshlikning beg’ubor bag’riga qaytib,

Onamiz poylarin tavof etaylik.        

 

O’tdi qancha oylar,qanchadir yillar,

Bizni chorlar bo’ldi turli manzillar,

Hayot bog’imizdan keltirib gullar,

 Onamiz poylarin tavof etaylik. 

 

Taqdir boshga solar goh to’y, goh aza,

Ichgan oshing bo’lar goho bemaza,

Insonning umriku bir oniy lahza,

Onamiz poylarin tavof etaylik.        

 

Do’stim so’zlarimni yodda tut albat,

Men senga qilmadim bugun nasihat,

Azaldan ayondir qaydadir jannat,

Onamiz poylarin tavof etaylik.

                                                                    

 

 

  To’lin oy…

To’lin oy jamolin ko’rsatgan palla,

Sokinlik kuyini taratmoqda tun…

Chigirtkalar aytar zaminga alla,

Menga uyqu bermas dildagi tugun…

Oh qancha fusunkor yulduzli osmon,

Marjon shodasidek go’yo bir butun.

 Orom olayapti hatto keng jahon,

Menga uyqu bermas dildagi tugun…

Tuydim tuyg’ularning turfalarini,

Dildagi har kuyik shulardan belgi.

Qiziq oshiqlar qalb kulbalarini,

Chertib chiqarmikan har tun ilk sevgi?!

 

                  

                                                 

                                           

 

 

 

 

 

     Onam jannatimdur, Otam davlatim!

Ming shukr qo’l cho’zsam bulut qucharman,

Hayot sinovidan bir-bir kecharman.

Duolari bo’lar mening tayanchim,

Mehridan quvonib yeldek ucharman.

Baxtsizman desam gar shudir kulfatim ,

Onam jannatimdur Otam davlatim!

 

Bir og’iz shirin so’z qadrin ey do’stlar,

Ota Onadan ortiq ayting kim bilar?

Farzandim, dilbandim –deya dard chekkan,

O’sha nursiz kunlar, uyqusiz tunlar.

Yarashadi bugun qurgan savlatim

Onam jannatimdur Otam davlatim!

 

Chin do’st ham boshga ish tushsa bilinar,

Qadamda uchragan do’stlar ko’p bo’lar.

Dasturxon tuzasang ulfating bisyor,

Ular go’yo shamdir- shamolda o’char

Dildamas davrada bo’lar ulfatim,

Onam jannatimdur Otam davlatim!

 

Kun kelar qizlarim qalamqosh bo’lar,

O’g’illarim menga yelkadosh bo’lar.

Shunda ota onam uyim to’rida ,

Duo qilsalar bas mustajob bo’lar.

Allohdan men faqat shuni istadim,

Onam jannatimdur Otam davlatim!

 

 

 

                                                                                                     Rahmatulla Temirov

 

                                     Shukrona

Erk ziyosi dilni etar nurafshon,

Har bir zarra ezgulikni tilaydi.

Yurt osmoni el ko’ksidek bepoyon,

Beshigida Alpomishlar belaydi.

Har o’g’loni doston bo’lgulik elim,

Dunyoni sabr-la shukr asraydi!

 

Bu Vatan bo’lmagan, bo’lmas egasiz,

Tarix aytib turar so’zlari bilan.

Ajdodlar bugunni ko’rmoqda shaksiz,

Munosib avlodlar ko’zlari bilan.

Sabrsiz har kimning qalbi nuraydi,

Dunyoni sabr-la shukr asraydi!

 

Ulug’ yo’lga chiqqan ulug’im elim,

Yo’ling to’solmaslar sendek karvonni.

Duoga qo’l ochgin urug’im elim,

Boshi omon bo’lsin odil sarbonni!

Qayga boqsang ko’rib ko’zing quvnaydi,

Dunyoni sabr-la shukr asraydi!

 

Vatan bolang bo’lib aytar so’zim bor,

Doim asragaymiz sendek bo’stonni.

Xalqim mehring bir gul , gulki be’takror,

Gul bilan bezaylik O’ZBEKISTONNI !!!

Ming shukr har dilni erk erkalaydi,

Dunyoni sabr-la shukr asraydi!

 

 

 

                                                                         

Rahmatulla Temirov

Buxoro davlat universiteti Pedagogika fakulteti pedagogika psixologiya ta’lim yo’nalishi

 3- bosqich talabasi

 

Russian mobile menu

BuxDU ATM tomonidan ishlab chiqildi.
Click to listen highlighted text! Powered By GSpeech