Welcome to buxdu   Click to listen highlighted text! Welcome to buxdu Powered By GSpeech

"Vatan himoyasi - har bir fuqaroning sharafli burchi"...

Mavzu: Vatan himoyasi - har bir fuqaroning sharafli burchi
 Reja:
I.    Kirish. Jon-u tanim, sajdagohim.
II.    Asosiy qism:
1.    Ham Temurbek, ham Ulug’bek, Alisher, Bobur.
      Sizlar tuzgan bu saltanat  saltanat bo‘ldi.

2.    Millatim nasli bashardur, vatanim kurrai arz,
     Ikkisin xizmatin farzdur, ikkisindan jon qarz.
3.    Abadiyat o‘sdi ko‘z oldimizda,
      Shundoq yonimizdan o‘tdi Mangulik.
4.    Xalqim, quvon, boshingga
     Sharaf keldi, shon keldi.
III.    Xulosa. Aylayin qalbimni tortiq nurli bo‘stonim, senga
                             Sen Vatandirsan, fidodir tanda bu jonim senga.
                                                              Ulug‘vor niyatlarga kor qilmas ajal
                                                           Kim yurtdan yovni quvsa, mendirman o‘shal.
(Maqsud Shayxzoda)
  Vatan - kindik qonim to‘kilgan go‘sha, har tongda qalbim to‘la shijoat bilan yo‘l oladigan  o‘quv maskanim, hafta oralab sog‘inib boradigan qadrdon mahallam, qo‘ni-qo‘shnilarim, yaqinlarimning iliq chehralari, onajonimning tandirdan uzib menga ilinadigan shirmoy nonlari, otajonimning pand-u nasihatlari, buvijonimning o‘gitlari… Qalbim to‘la hayajon bilan shuni baralla aytamanki, men bu dunyodagi eng baxtli insonman. Chunki men xalqi tanti, oliyjanob, mehmondo‘st yurt - O‘zbekistonda yashayman, shu yurtning havosidan nafas olaman. Aslida, bu aziz tuproq ota-bobolarimiz tomonidan qoldirilgan noyob merosdir. Ajdodlarimiz ana shu merosni qo‘lga kiritish uchun qanchadan-qancha zahmat chekkanlar, o‘z jonlarini qurbon qilganlar. Shuning uchun ham biz bu merosni e’zozlashimiz,  qadriga yetishimiz, mustahkamlashimiz darkor. Birinchi Prezidentimiz Islom Karimov o‘zining “O‘zbekistonning o‘z istiqlol va taraqqiyot yo‘li” risolasida “O‘zbekiston - har bir o‘zbek, bu zaminda yashaydigan har bir milat vakili uchun sevimli Vatandir”, - deya aziz Vatanimizning nechog‘lik qadrdon, sajdagoh kabi muqaddas ekanligini uqtiradilar.
   Vatanimizning shonli tarixiga nazar tashlaydigan bo‘lsak, tarixda shunday buyuk daholarimiz yashab o‘tganlarki, ularning xizmatlari tahsinga sazovor. Jumladan, Temur Malik, Najmiddin Kubro, Jaloliddin  Manguberdi, Amir Temur kabilar Vatanning har bir qarich yeri uchun jon olib, jon berib kurashganlar, uni himoya qilganlar.  Amir Temur bobomiz butun hayotini Vatan himoyasi va ozodligi yo‘lida cho‘l-u biyobonlarda, tog‘-u toshlarda, jang-u jadallarda o‘tkazgan. Bo‘riboy Ahmedovning “Amur Temur” romani buyuk Sohibqironning Vatan, xalq va tarix oldidagi xizmatlarini yoritishga bag‘ishlangan. Asarda Amir Temur va To‘xtamishxon o‘rtasidagi 1395-yil 27-aprelda sodir bo‘lgan hayot-mamot jangi Sohibqiron bobomizning g‘alabasi bilan tugaganligi, 1402-yil 20-iyulda Anquriya (Anqara) yonidagi bo‘lgan urush va Boyazid I Yildirimning tor-mor keltirilishi, bobomizning mardonavor kurashlari haqida ajoyib fikrlar keltirilgan. Shuningdek, Amir Temur davrida Turkiston zaminini Ispaniya, Italiya, Fransiya, Angliya va boshqa davlatlar taniganliklari alohida ta’kidlangan. Xullas, bobomiz o‘z vatani va xalqini butun vujudi bilan himoya qiladi. Sohibqironning “Temur tuzuklari” da ham Vatan himoyasi yo‘lidagi oqilona harakatlari o‘z ifodasini topgan. Jumladan, Amir Temur Rum podshohi Qaysarga urush qilmasdan sulh tuzishni taklif qiladi. Ammo u bunga ko‘nmaydi. “Qaysar to‘rt yuz ming piyoda va otliq askari  bilan menga qarshi  yuzlandi. Urush boshladim. Va uni yengdim. Yetti yillik yurishdan so‘ng zafar va nusrat bilan Samarqandga qaytdim”, -  deyiladi asarda. Ajoyib qahramonlik…
Hamza Hakimzoda Niyoziy, Cho‘lpon, Qodiriy asarlarida ham haqiqiy vatanparvarlik, Vatanni sevish, uni himoyalash, ozodlik g‘oyalari yetakchilik qiladi. Hamzaning “Millatim nasli bashardur…” deb boshlanuvchi she’rida vatanning muqaddas ekanligi, vatanga xizmatda bo‘lish, uni himoya qilish farz ekanligi ta’kidlanadi. Hamza bilan zamondosh bo‘lgan boshqa ijodkorlar asarlarida ham xuddi shunday mavzularni ko‘ramiz. Cho‘lponning she’rlarida erk, Vatanni  tinch va ozod ko‘rish kabi tuyg‘ular tarannum etiladi. Oybekning “Qutlug‘ qon” asarida  Yo‘lchi esa haqiqiy xalqparvarlik namunasini ko‘rsatadi, Rus istibdodi tomonidan  “Mardikorlikka olish”ga qarshi kurashadi. O‘z xalqini uyg‘otishga da’vat etib, Vatanini sovetlar hukumatidan ozod qilishga intiladi. Afsusku, u halok bo‘ladi. Yo‘lchi obrazi orqali xalqni mardonavor himoya qilish har bir insonnning sharafli burchi ekanligini ko‘ramiz. Abdulla Qodiriyning “O‘tkan kunlar” romanida Yusufbek hoji obrazida ham xalqini himoya qilish, uni ardoqlash kabi xususiyatlar namoyon bo‘ladi. Toshkentning yetmish kunlik qamali vaqtida Azizbekning sodiq fuqarolari bo‘lgan toshkentliklar chin ko‘ngildan unga xizmat qilib, nihoyat qipchoqlarni umidsiz Qo‘qonga qaytarishga noil bo‘ladilar. Ammo shuncha sodiqlik evaziga Azizbek Yusufbek hojiga xalqdan o‘ttiz ikki tangadan soliq olishni buyuradi. Lekin Yusufbek hoji xalqning kelajagini o‘ylab uni zolim xonga qarshi kurashga chorlaydi. Kuchi yetmayotganligini sezgan Yusufbek hoji Qo‘qon xoni Normuhammadni yordamga chaqiradi. Kurash zolim xon ustidan g‘alaba bilan yakunlanadi. Shu tariqa xalq himoyalanadi. Ana buni haqiqiy jasorat desak bo‘ladi.
            Mustaqilligimiz asoschisi, buyuk davlat va siyosat arbobi Islom Karimov bosib o‘tgan shonli hayot yo‘li, uning buyuk tariximizni tiklagan va yangi tarixni yaratgan shaxs sifatidagi amalga oshirgan beqiyos ishlari tahsinga sazovordir. Biz istiqlol tufayli o‘zimizning davlat ramzimizga, milliy valyutamizga, qomusimizga ega bo'ldik. Milliy an’ana va urf-odatlarimiz, qadriyatlarimiz qayta tiklandi. Ozod bo‘ldik…
         Birinchi Prezidentimiz tomonidan 1992-yilning 8 - dekabrida O‘zbekiston Respublikasining Konstitutsiyasi qabul qilindi. Konstitutsiyamizning “Fuqarolarning burchlari” deb nomlanuvchi bobining 52 - moddasida shunday so‘zlar bor: “O‘zbekiston Respublikasini himoya qilish - O‘zbekiston Respublikasi har bir fuqarosining burchidir”. 1992-yil 14-yanvarda milliy armiyamizga asos solindi. 1993-yil 23-dekabrdagi qonun bilan 14-yanvar “Vatan himoyachilari kuni” sifatida belgilandi. Jasur va fidoyi, o‘z burchiga sadoqatli siymolarning xizmatlarini biz hech qachon unuta olmaymiz.
          Muhtaram Birinchi Prezidentimiz vafotlaridan keyin hokimiyat tepasiga kelgan yangi Prezidentimiz Shavkat Mirziyoyev tinib-tinchimasdan, jon-u jahdlari bilan shu yurtning taraqqiyoti uchun harakat qilyaptilar. Jumladan, chet el davlatlari bilan uzilib qolgan aloqalar qayta tiklandi, chegaralarimiz yanada mustahkamlandi, mamlakatimizda har bitta sohaga alohida e’tibor qaratilyapti. O‘zbekiston Qurolli Kuchlarining 27 yilligi munosabati bilan harbiy sohada bir qancha islohotlar amalga oshirildi. “Zamonaviy, qudratli armiya - tinch-osoyishta hayot kafolati” ekanligini ta‘kidlagan Prezidentimiz armiyani zamonaviy qurol, harbiy texnika bilan ta’minladi. Bu ishlar O‘zbekiston Qurolli Kuchlarida amalga oshirilayotgan islohotlar va bu yo‘nalishda bajarilayotgan dolzarb vazifalarning nechog‘lik ahamiyatli ekanligini ko‘rsatadi. Prezidentimiz yaratayotgan imkoniyatlardan unumli foydalanishimiz kerak. “Yoshlarga oid davlat siyosati to‘g‘risida”gi 2016- yilda qabul qilingan qonun biz yoshlar uchun keng yo‘llar ochib beradi. “Yoshlar - kelajagimiz”, “Har bir oila - tadbirkor” kabi davlat dasturlari esa qalbimizni g‘urur va iftixorga to‘ldiradi. Men ham ana shunday imkoniyatlardan unumli foydalangan holda kelajakda oliy o‘quv yurtini tamomlab, xususiy maktab ochmoqchiman. O‘quvchilarimni vatanparvarlik ruhida tarbiyalab, vatanimiz taraqqiyoti uchun o‘zimning beminnat hissamni qo‘shmoqchiman. Ta’lim-tarbiya jarayonida ma’naviy, axloqiy, madaniy qadriyatlarimizni ustun qo‘ygan holda, yoshlarning tashabbusini qo‘llab-quvvatlab, intellektual jihatdan kamol topadigan mutaxassislarni yetishtirishim lozim. Agarda har bir yosh avlod ma’naviy jihatdan yetuk bo‘lsa, ulardan vatan xoini ham, vatanfurush ham chiqmaydi. Men aynan ana shu yo‘l bilan vatanim himoyasiga xizmat qilaman:
Aylayin qalbimni tortiq nurli bo‘stonim, senga,
          Sen Vatandirsan, fidodir tanda bu jonim senga.

 

Ashurova Nodira
Buxoro davlat universiteti filologiya
 Fakulteti 3- bosqich talabasi

Russian mobile menu

  • Вакансии
  • Новости
  • Структура
  • Деятельность
  • Студентам
  • Абитуриент
  • BuxDU ATM tomonidan ishlab chiqildi.
    Click to listen highlighted text! Powered By GSpeech