Welcome to buxdu   Click to listen highlighted text! Welcome to buxdu Powered By GSpeech

SIZNING OILANGIZ BAXTLIMI?

       “Baxtli oilalarning barchasi bir-biriga o‘xshaydi”,-deb yozgan edi buyuk yozuvchi Lev Tolstoy o‘zining “Anna Karenina” romanida. Albatta yozuvchi haq. Hozirgi zamon psixologlari baxtli oilalarni birlashtiradigan umumiy xislatlarni ko‘rsatib berishmoqda. Keling, biz ham baxtli oila  kalitini tavsiya etayotgan bu xislatlar haqida fikr yuritib ko‘ramiz.
Ular bir-biri haqida qarindosh va do‘stlariga shikoyat qilmaydi.

    Baxtiyor er-xotin munosabatlariga uchinchi shaxsni jalb qilish noto‘g‘ri ekanligini biladi. Agar tushunmovchilik yuzaga kelsa ular ochiqchasiga bir-biri bilan gaplashib oladi. Hatto ayolning dugonalari yoki erkakning do‘stlari ham betaraflikni saqlay olmaydi va munosabatlarga faqat putur yetkazadi xolos. Qarindosh-urug‘lar haqida gapirmasa ham bo‘ladi. Albatta ular o‘zlariga yaqin odamning tomonini olib, ahamiyatsiz, kichik  muammochalarni, katta muammolarga aylantirib yuborishadi. Shu bilan birga o‘rtada gap-so‘zlar ko‘payib, qayta-qayta ko‘ngilni g‘ash qiluvchi mavzuga e‘tibor qaratilishiga sabab bo‘ladi.
     Ular bir-birini boshqalar bilan solishtirmaydi
    Baxtiyor er-xotin bir-birini boricha, barcha kamchiliklari bilan qabul qiladi va sevadi. Ular bir-birining ustidan kulmaydi, fikrlar va qarashlaridagi tafovutni qabul qiladi va bir-biriga ma‘naviy o‘sishda yordam beradi. Bir-birini “peredelka” qilishga harakat qilmaydi. Ular dunyoda ideal inson bo‘lmasligini yaxshi bilishadi, chunki bir-birini tanlashganda ham boshqalardan farq qiladigan va faqatgina shu insonga xos bo‘lgan o‘zgacha tomonlari ularga yoqqani uchun tanlashganini tushunishadi.
     Ular o‘zlarini qurbon qilib ko‘rsatmaydi
    Baxtli juftliklar bir-birini o‘z muammosida ayblamaydi. Aksincha, kelib chiqqan muammoda ikkalasining javobgarligi borligini to‘g‘ri tushunadi. Aybdor izlab, hammaga o‘zini qurbon qilib ko‘rsatish o‘rniga muammoni birgalikda yechishga yo‘l axtaradi.
     Ular doim muammoning ustidan kulishadi
     Baxtli insonlar doim birgalikda yaxshi, baxtli kunlarini, onlarini eslashni, kulishni, birga hordiq chiqarishni, hazillashishni, shu tariqa bir-birlariga bo‘lgan munosabatni yaxshilashni, mustahkamlashni bilishadi. Hayot ularga qarshi chiqqanda ham, baxtli kunlarini eslab, muammoning ustidan kulishga imkon topishadi.
      Ular bir-birini tanqid qilib, “egov” lamaydi
     Baxtli juftliklar doim bir-birlarining yaxshi tomonlarini ko‘rishga harakat qilishadi, muammo yuzaga kelganda esa uni anglashga harakat qilishadi. Agar jufti uning ko‘ngliga yoqmaydigan ish qilayotgan bo‘lsa, unga buni aytishning eng ma‘qul yo‘lini axtarib topadi. Doim ham ko‘z yoshi yoki tanqid bilan o‘zingiz istagan narsaga erisha olmaysiz. Aksincha, u sizning o‘zi haqidagi past fikringizni tasdiqlash uchun qasdiga ish qila boshlaydi. Eng yomoni u sizni tinglamay qo‘yadi.
       Ular bir-biridan folbinlik talab qilmaydi
      Baxtli oilalar bir-biriga ehtiyojlari haqida qanday bildirish yo‘lini axtarib topadi. Ular o‘zlarining katta odamlar ekanini, bir-biridan yashirincha xafa bo‘lish o‘rniga o‘zlariga kerak bo‘lgan narsani to‘g‘ri tushuntirib, gaplashib olish yo‘lini biladi. Agar ularga e‘tibor yetishmayotgan bo‘lsa buni ochiqchasiga, chiroyli fikrlar bilan tushuntiradi.
       Ular faqat o‘z rollariga “yopishib olmaydi”
      Baxtli juftliklar gender rollari masalasiga qat‘iy yopishib olmaydi. Ular o‘zgaruvchan va ko‘p vazifali bo‘lishga, oiladagi vazifalarini birgalikda bajarishga harakat qilishadi. Oila ishlarini navbat bilan qilishga, shu yo‘l orqali sevgan insonining bir oz bo‘lsa ham dam olishiga, chalg‘ishiga imkon yaratadi. Ovqat pishirish, uyni tozalash, bolaga qarash, axlatni to‘kib kelish yo bo‘lmasa bozor-o‘charni ham navbat bilan qilishadi.
        Ular bir-biriga baqirmaydi
       Er-xotin bir-biriga baqirishga yo‘l qo‘yishmaydi, chunki hadeb baqiradigan inson beqaror va o‘ziga ishonmagan odam ekanligini va tezda uni hech kim eshitmay qo‘yishini yaxshi bilishadi.  
       Ular har ishda bir-birini nazorat qilavermaydi
      Rashk qilish, nazorat qilish, hukmdorlik qilishga urinish-o‘ziga ishonchning  yetarli bo‘lmagan hollarda kuzatiladigan psixik holat.  Umr yo‘ldoshingizga “o‘z hududi”ga ega bo‘lish uchun imkon yaratib bering, shunda u doim sizga intiladi.
Ular bir-biridan mukammallik kutmaydi
Umr yo‘ldoshingizni “oq otdagi shaxzoda” yo bo‘lmasa barcha ishda ideal bo‘la oladigan “farishta” bo‘lishini kutib, real insonning o‘ziga yarasha kamchiliklari bilan duch kelganda hafsalangiz pir bo‘lib, zardangiz qaynamasin. O‘zingiz va boshqalarni o‘z holicha qabul qiling. Juftingizning yaxshi tomonlarini axtarib topib, uning yutuqlari uchun maqtashni unutmang.
                                                                                                                                                                                                   BuxDU psixologi D.Hamdamova

 

Russian mobile menu

BuxDU ATM tomonidan ishlab chiqildi.
Click to listen highlighted text! Powered By GSpeech