Talabalar uchun yo'riqnoma

1. Buxoro davlat universiteti rektorining buyrug’i bilan o`qishga qabul qilingan shaxs Buxoro davlat universitetining talabasi hisoblanadi. Talabaga talabalik guvohnomasi hamda reyting (yoki sinov) daftarchasi beriladi.

2. Buxoro davlat universitetiga o`rta (to`liq) umumiy, hunar-texnik o`rta maxsus (texnikumlar, bilim yurtlari) hamda o`rta maxsus, professional (akademik litseylar va kasb -hunar kollejlari) ma`lumotga ega bo`lgan shaxslar arizalari bo`yicha, test sinovlari natijalariga ko`ra tanlov yo`li bilan “O`zbekiston Respublikasi oliy o`quv yurtlariga talabalarni qabul qilish tartib va qoidalari to`g’risidagi Nizom”ga muvofiq davlat grantlari hamda to`lov — kontrakt asosida qabul qilinadi. 
3. Buxoro davlat universitetining talabalari quyidagi huquqlarga:
• fan, texnika va madaniyatning zamonaviy taraqqiyoti darajasiga mos keluvchi bilimlarni olish;
• universitetning muhim masalalarini muxokama etish va hal qilishda, shu jumladan, jamoatchilik tashkilotlari hamda oliy o`quv yurtining boshqaruv organi orqali qatnashish;
• o`zi tanlagan mutaxassislik bo`yicha rivojlangan mamlakatlarning nufuzli oliy o`quv yurtlarida o`qishni davom ettirishi uchun xalqaro va respublika jamg’armasidagi tanlovlarda ishtirok etish:
• universitetning kutubxonasi, axborot jamg’armasi, o`quv, ilmiy, tibbiy va boshqa bo`g’inlarining xizmatidan bepul foydalanish;
• ilmiy — tadqiqot ishlarining barcha turlarida, konferentsiyalar, simpoziumlarda ishtirok etish, o`z ishlarini nashrga taqdim etish, shu jumladan, universitet nashrlarida ham;
• tanlangan yo`nalish (mutaxassislik) bo`yicha o`tiladigan fanlardan tashqari universitetda o`qitiladigan boshqa har qanday fanlarni ham shartnoma asosida o`zlashtirish;
• universitet ma`muriyatining buyruq va farmoyishlari ustidan qonunchilikda belgilangan tartibda shikoyat qilish;
• qonunchilikda belgilangan tartibda harbiy ixtisoslik bo`yicha ta`lim olish;
•O`zbekiston Respublikasi qonunchiligiga zid kelmaydigan va universitetga berilgan boshqa huquqlardan foydalanish.
4. Kunduzgi o`quv shaklida ta`lim olayotgan talabalar O`zbekiston Respublikasi hukumati, vazirlik tomonidan belgilangan tartib va miqdorda stipendiya bilan ta`minlanadilar; talabalar tegishli Nizomlar asosida O`zbekiston Respublikasi Prezidenti nomidagi, atoqli shaxslar nomidagi Davlat stipendiyalari, shuningdek, o`qishga yo`llagan yuridik va jismoniy shaxslar tayinlangan stipendiyalarni olish huquqiga egadirlar.
Tibbiy ko`rsatmalar va boshqa istisno hollarda universitet tomonidan belgilangan tartibda akademik ta`til beriladi.
Birinchi kurs talabalariga akademik ta`til istisno hollarda, qat`iy yakka (individual) tartibda beriladi.
O`zbekiston Respublikasi qonuniga muvofiq kunduzgi o`quv shakli talabalariga universitetda o`qiyotgan vaqti davomida harbiy xizmatga chaqirish muddatini kechiktirish imkoni beriladi.
Turar joyga muhtoj talabalar universitetning talabalar turar joyidan sanitariya me`yorlari va qoidalariga javob beradigan joy bilan ta`minlanadilar. Talabalar turar joyida talabalarga kommunal maishiy xizmatlar uchun to`lov miqdori qonunchilikka muvofiq belgilanadi. Turar joyga muxtoj talabalar mavjud bo`lgan holda, universitet talabalar turar joyining maydonidan boshqa maqsadlarda foydalanish (ijaraga berish, boshqa kelishuvlar)ga ruxsat etilmaydi.
Kunduzgi o`kuv shaklida ta`lim olayotgan talabalarga o`qishdan bo`sh vaqtlarda mehnat shartnomasi bo`yicha universitetning o`zida, shuningdek, boshqa joylarda ishlashga ruxsat etiladi. Bu ish mehnat qonunchiligiga muvofiq o`rindoshlik hisoblanmaydi.
O`zbekiston Respublikasi qonunchiligiga muvofiq Buxoro davlat universiteti tomonidan talabalarga boshqa huquqlar belgilanishi mumkin.
5. Agar talaba o`z arizasiga ko`ra yoki uzrli sabablar bilan talabalik safidan chiqarilgan bo`lsa, u 5 yil muddat ichida o`qishdan chetlashtirilgunga qadar qanday asosda (bepul yoki to`lov — shartnoma) o`qigan bo`lsa, o`sha asosda o`qishga qayta tiklanish huquqiga ega. Uzrsiz sabablarga ko`ra talabalar safidan chetlashtirilgan shaxslarni universitetga o`qishga qayta tiklash va o`qitish faqat to`lov kontrakt asosida amalga oshiriladi. To`lov — shartnoma shartlarini bajarmaganligi sababli talabalar safidan chiqarilgan talabalar ko`chirish va tiklash komissiyasining karoriga asosan universitet rektorining buyrug’i bilan o`qishga qayta tiklanishi mumkin. Talabalarni o`qishga qayta tiklash tartibini ta’lim boshqaruvi bo`yicha vakolatli davlat organi belgilaydi.
Buxoro davlat universitetining talabalari boshqa oliy o`quv yurtlariga o`qishlarini ko`chirish (o`qishga qayta tiklanish) huquqiga ega. Akkreditatsiya qilinmagan oliy o`quv yurtlaridan talabalarni Buxoro davlat universitetiga o`qishini ko`chirish (o`qishga tiklash) mumkin emas.
Talabalar o`qishini akkreditatsiya qilingan bir oliy o`quv yurtidan boshqasiga ko`chirish (o`qishga tiklash) tartibi va shartlarini O`zbekiston Respublikasining Vazirlar Mahkamasi belgilaydi.
6. Buxoro davlat universiteti talabalari oliy ta`limning ta`lim dasturlari va o`quv rejasida nazarda tutilgan bilimlarni egallashlari, topshiriqlarning barcha turlarini belgilangan muddatda bajarishlari zarur hamda Buxoro davlat universitetining Nizomga, ichki tartib — qoidalariga talabalar turar joyi qoidalariga rioya etishlari shart.
O`zbekiston Respublikasi hukumati qarorlarida nazarda tutilgan hollardan tashqari, talabalarni o`qish vaqti hisobidan o`quv jarayoni bilan bog’liq bo`lmagan ishlarga jalb etish ma`n etiladi.
7. Ushbu Nizomda universitetining talabalariga quyidagi intizomiy jazolar ko`llanilishi mumkin: xayfsan, muayyan muddatga stipendiyadan mahrum etish, universitet talabalari safidan chiqarish.
Talabalar bilim egallashi, ko`rsatilgan muddatlarda o`quv rejalari va ta`lim standartlari ko`zda tutgan topshiriqlarning hamma turlarini bajarishlari, universitet Nizomiga, universitet ichki — tartibi va jamoa hayoti qoidalariga rioya qilishlari shart.
Uzrli sabablar bo`yicha o`quv dasturi talablarini bajara olmagan talabalarga yangi o`quv yili boshlanguncha qadar akademik qarzlarni uzish imkoniyati beriladi. Ko`rsatilgan muddatlar ichida davlat ta`lim standartlariga binoan belgilangan kasbiy ta`lim dasturlari hajmini o`zlashtirmagan talaba universitet talabalari safidan chiqariladi.
Intizomiy jazolar talabalarning kasallik yoki ta`tilda bo`lgan vaqti hisobga olinmagan holda xatti-harakat aniqlangandan so`ng, bir oydan va xatti-xarakat sodir etilgandan so`ng olti oydan kechiktirilmay qo`llaniladi.
Talabalarni kasallik paytida, ta`tilda, akademik ta`til yoki homiladorlik va tug’ish holati bilan bog’liq bo`lgan ta`til paytlarda talabalar safidan chiqarish mumkin emas.
8. Buxoro davlat universitetida ta`limning maxsus sirtqi o`quv shakllarida muvafaqiyatli o`qiyotgan talabalarga ularning ish joyidan O`zbekiston Respublikasi Mehnat Kodeksining 218, 257 — moddalarida nazarda tutilgan imtiyozlar (maosh saqlangan yoki saqlanmagan holda qo`shimcha ta`til, oliy o`quv yurti joylashgan manzilga borish va kelish uchun yo`l haqi va boshqalar) beriladi.

Talabalar uchun O‘zbekiston Respublikasi Prezidentining davlat stipendiyalari va ularni tayinlash tartibi to‘g‘risida NIZOM

1. O‘zbekiston Respublikasi Prezidentining davlat stipendiyalari O‘zbekiston Respublikasi fuqarolari bo‘lgan davlat oliy ta’lim muassasalari (bakalavriat va magistratura bo‘yicha alohida) talabalariga O‘zbekiston Respublikasi Oliy va o‘rta maxsus ta’lim vazirligi tomonidan o‘tkaziladigan tanlov natijalariga binoan tayinlanadi.

2. Talabalarga tayinlash uchun belgilangan O‘zbekiston Respublikasi Prezidentining davlat stipendiyasi kvotasi (o‘n bitta) quyidagi ta’lim yo‘nalishlaridan har biri bo‘yicha bittadan stipendiya hisobidan bakalavriat va magistratura uchun alohida-alohida taqsimlanadi:
qishloq va suv xo‘jaligi;
texnika va informatika;
sog‘liqni saqlash va ijtimoiy ta’minot;
ijtimoiy-gumanitar va ijtimoiy fanlar;
tabiiy fanlar;
biznes va boshqaruv;
pedagogika;
madaniyat, san’at va sport;
xorijiy tillar;
huquq va xalqaro munosabatlar;
jurnalistika.

Ushbu ro‘yxatga Vazirlar Mahkamasi tomonidan har o‘quv yili boshida, ta’lim yo‘nalishlaridagi ustuvorliklarni o‘zgartirishning maqsadga muvofiqligidan kelib chiqqan holda, O‘zbekiston Respublikasi Oliy va o‘rta maxsus ta’lim vazirligi tavsiyasiga binoan o‘zgartirish va qo‘shimchalar kiritilishi mumkin.

3. Talabalarga O‘zbekiston Respublikasi Prezidentining davlat stipendiyalarini tayinlash uchun quyidagi mezonlarni bajarish belgilanadi:
umumta’lim tayyorgarligini ilmiy-tadqiqot (ijodiy ishlar) ishlari bilan uyg‘unlashtirish;
yo‘nalishlar bo‘yicha konferensiya (tanlov)larda qatnashish;
kamida ikkita e’lon qilingan ishlar (asarlar)ning mavjudligi;
tillarni — davlat tilini va bitta xorijiy chet tilni bilish (Mustaqil Davlatlar Hamdo‘stligi mamlakatlari davlat tillaridan tashqari), bakalavriatdagi ta’lim yo‘nalishi yoki magistraturadagi mutaxassislik xorijiy til bo‘lgan taqdirda esa qo‘shimcha ravishda yana bitta xorijiy tilni bilish talab qilinadi;
O‘zbekiston tarixini bilish.

Tillarni, axborot texnologiyalarini, O‘zbekiston tarixini bilish bo‘yicha talab darajalarini O‘zbekiston Respublikasi Oliy va o‘rta maxsus ta’lim vazirligi belgilaydi.

O‘zbekiston Respublikasi Prezidentining davlat stipendiyasiga talabgorlar ushbu fanlar bo‘yicha o‘z bilim darajasini aniqlash uchun O‘zbekiston Respublikasi Vazirlar Mahkamasi huzuridagi Davlat test markazida (mintaqalar bo‘yicha) maxsus test sinovlari topshiradilar. Markaz yakuniy vedomostlarni test sinovlari natijalari bilan birga O‘zbekiston Respublikasi Oliy va o‘rta maxsus ta’lim vazirligiga taqdim etadi.

4. O‘zbekiston Respublikasi Prezidentining davlat stipendiyasiga nomzodlar ko‘rsatish, talabgorlar nomzodlarining o‘qishdagi va ilmiy (ijodiy) faoliyatdagi muvaffaqiyatlari ommaviy ravishda muhokama qilingandan so‘ng, davlat oliy ta’lim muassasalarining ilmiy kengashlari tomonidan amalga oshiriladi.

Talabgorlar dastlabki ko‘rib chiqish uchun ilmiy kengashga quyidagilarni topshiradilar:
sinov daftarchasidan ko‘chirma;
dekanat, kafedra tavsiyanomasi;
ilmiy (ijodiy) ish annotatsiyasi;
rahbarning fikr-mulohazalari;
ilmiy (ijodiy) ishga taqriz;
ilmiy ishlar ro‘yxati va ularning bosma nusxalari.

Barcha hujjatlar ikki nusxada taqdim qilinadi. Hujjatlarning har bir to‘plami jildga joylanadi, har bir jild muqovasida ishni taqdim qilgan muassasaning nomi, talabgorning familiyasi, ismi va otasining ismi, ishning nomi ko‘rsatiladi.

5. Ilmiy kengashlar yashirin ovoz berish orqali, oddiy ko‘pchilik ovoz bilan O‘zbekiston Respublikasi Prezidenti davlat stipendiyalarini tayinlash uchun stipendiatlar nomzodlarini ko‘rsatish to‘g‘risida qaror qabul qiladilar.

Ilmiy kengashlar qarorlari vazirliklar va muassasalarning O‘zbekiston Respublikasi Prezidentining davlat stipendiyalarini tayinlash haqida O‘zbekiston Respublikasi Oliy va o‘rta maxsus ta’lim vazirligiga tavsiyanoma yuborishi uchun asos hisoblanadi.

6. O‘zbekiston Respublikasi Oliy va o‘rta maxsus ta’lim vazirligi stipendiyalar tayinlash haqidagi tavsiyanomalarni yiliga bir marta ko‘rib chiqadi. Hujjatlarni qabul qilish muddati — 1 - 15 avgust, ko‘rib chiqish muddati — 10 - 25 sentyabr.

7. Davlat oliy ta’lim muassasalari talabalariga O‘zbekiston Respublikasi Prezidentining davlat stipendiyalarini tayinlash O‘zbekiston Respublikasi Oliy va o‘rta maxsus ta’lim vazirligi hay’ati qarori bilan amalga oshiriladi.

Stipendiyalar tayinlanishidan avval talabgorlarning belgilangan mezonlarga muvofiq bilim va ilmiy (ijodiy) tayyorgarlik darajasi puxta ekspertizadan o‘tkaziladi.

Shu maqsadda O‘zbekiston Respublikasi Oliy va o‘rta maxsus ta’lim vazirligi:
zimmasiga O‘zbekiston Respublikasi Prezidentining davlat stipendiyalariga talabgorlar orasidan tanlab olish yuklanadigan maxsus tanlov komissiyasi tuzadi;
talabgorlarning ta’lim va ilmiy (ijodiy) tayyorgarligi darajasini baholash maqsadida ishlarni ko‘rib chiqish uchun yo‘nalishlar bo‘yicha ekspertlar guruhlari tuzadi;
O‘zbekiston Respublikasi Vazirlar Mahkamasi huzuridagi Davlat test markazi bilan birgalikda axborot texnologiyalari, O‘zbekiston tarixi, xorijiy tillar bo‘yicha imtihon komissiyalarini tashkil etadi, test topshiriqlarini ishlab chiqadi;
tanlov komissiyasi va ekspert guruhlarining ish tartibini belgilaydi;
tanlov komissiyasi majlislarini o‘tkazish muddatlarini belgilaydi.

8. Tanlov komissiyasi talabgorlarning yakuniy tanlovini yashirin ovoz berish yo‘li bilan o‘tkazadi hamda talabgor va uning ishi uchun ovoz berishda ishtirok etgan komissiya a’zolarining kamida uchdan ikki qismi ovoz berganda talabalar nomzodini O‘zbekiston Respublikasi Prezidentining davlat stipendiyalarini tayinlash uchun tavsiya qiladi.

Agar ovoz berishdan so‘ng talabgorlar soni belgilangan kvotadan ko‘p bo‘lsa, ustunlik eng ko‘p ovoz olgan talabgorlarga beriladi.

Tanlov komissiyasining qarori O‘zbekiston Respublikasi Oliy va o‘rta maxsus ta’lim vazirligi hay’ati tasdiqlagandan so‘ng kuchga kiradi.

Tanlov komissiyasi O‘zbekiston Respublikasi Prezidentining davlat stipendiyalari sohibi bo‘lolmagan, lekin eng yaxshi ko‘rsatkichlarga ega bo‘lgan tanlov qatnashchilarini nomli davlat stipendiyalariga tavsiya qilish huquqiga ega.

9. O‘zbekiston Respublikasi Oliy va o‘rta maxsus ta’lim vazirligi hay’atining qarori davlat oliy ta’lim muassasalarining talabalarga O‘zbekiston Respublikasi Prezidentining davlat stipendiyalarini tayinlash va to‘lash haqida buyruq tayyorlashi uchun asos bo‘ladi.

10. O‘zbekiston Respublikasi Prezidentining davlat stipendiyalari talabalarga har yili, bir o‘quv yili uchun, 1 sentyabrdan boshlab, belgilangan miqdorlarga qat’iy rioya qilingan holda tayinlanadi.

11. O‘zbekiston Respublikasi Prezidentining davlat stipendiyalariga sazovor bo‘lgan talabalarga «Prezident stipendiyasining sohibi» guvohnomasi O‘zbekiston Respublikasi Oliy va o‘rta maxsus ta’lim vazirligi hay’ati majlisida tantanali ravishda topshiriladi.

12. O‘zbekiston Respublikasi Prezidentining davlat stipendiyalari sohiblari bo‘lgan talabalar davlat oliy ta’lim muassasasini bitirgach, ikki yil davomida grant asosida magistraturaga (bakalavr-stipendiatlar) va aspiranturaga (magistr-stipendiatlar) kirish imtihonlarisiz qabul qilinadi. Agar aspirantura va magistratura mutaxassisligi to‘g‘ri kelmasa, u holda kirish imtihonlari faqat aspirantura mutaxassisligi bo‘yicha topshiriladi.

13. O‘zbekiston Respublikasi Prezidentining davlat stipendiyalari sohibi bo‘lgan talabalar o‘qishni bitirgandan so‘ng, ikki yil mobaynida magistraturada (bakalavar-stipendiatlar) va aspiranturada (magistr-stipendiatlar) o‘qishni davom ettirish maqsadida xorijga jo‘natilish huquqini saqlab qoladilar.

14. Kundalik darslarni o‘zlashtirmaydigan, o‘quv intizomini va ilmiy odob-axloqni buzgan talabalarni o‘quv yili mobaynida O‘zbekiston Respublikasi Prezidentining davlat stipendiyalaridan mahrum qilish tasarrufida talaba o‘qiyotgan oliy ta’lim muassasalari bo‘lgan vazirliklar va idoralarning taqdimiga binoan O‘zbekiston Respublikasi Oliy va o‘rta maxsus ta’lim vazirligi hay’ati qarori bilan amalga oshirilishi mumkin.

15. Talabalarning O‘zbekiston Respublikasi Prezidentining davlat stipendiyalarini tayinlash bo‘yicha ariza va shikoyatlari qonun hujjatlarida belgilangan tartibda ko‘rib chiqiladi.

BuxDU Axborot-Resurs Markaziga a’zo bo’lish

Universitet axborot-resurs markaziga a’zo bo’lish uchun quyidagi xujjatlar kerak:

  1. Pasport nusxasi;
  2. 2 dona 3x4 rasm;
  3. Kontrakt asosida o’qishga qabul qilingan bo’lsa, kontrakt pulini to’laganligi haqidagi pattaning nusxasi.

 Foydalanuvchi diqqatiga!

1.Foydalanuvchi guvohnomasi ARM fondlaridan foydalanish huquqini beradi.

2.Ushbu guvohnomani boshqa kishiga berish va boshqa kitobxonning guvohnomasidan foydalanishga ruxsat berilmaydi.

3.ARMga a’zo bo‘lishda kitobxon ARMdan foydalanish qoidalari bilan tanishishi va ularga qat’iy rioya qilishi shart.

4.Adabiyotni olish uchun foydalanuvchi guvohnomasini taqdim etadi.

Dasturlashtirish kurslari

Bog`lanish

Address: Muljal: Buxoro shahri Amfiteatri

Manzil: Buxoro sh. Muhammad Iqbol ko`chasi 11 uy

Phone: Telefon: 8(365) 221-29-14

Fax: Fax: 8(365) 221-27-07

Avtobus yo`nlaishlai: 33, 88, 6, 436, 58, 10, 56, 76, 109,25