“Qoʻqon olimpiadasi” xususiy sektor vakillari tomonidan ilk marotaba tashkil etilmoqda. Shuni inobatga olib, buning zamirida kelajakda yurtimiz ijtimoiy-iqtisodiy rivojlanishini yangi bosqichga koʻtarish maqsad qilingan. Qolaversa, Oʻzbekistonning xalqaro hamjamiyat orasida, xususan, ilm-fan olamida oʻziga xos nufuzini oshirishga xizmat qiladigan isteʼdodli yoshlarni kashf etish ham koʻzda tutilgan.

Zero, mamlakatimiz rahbarining yangi Oʻzbekistonni barpo etish boʻyicha daʼvatlari, yaʼni “Yangi Oʻzbekiston — maktab ostonasidan, taʼlim-tarbiya tizimidan boshlanadi”, degan ezgu gʻoyasini amalga oshirish barchamizning, jumladan, sohaga daxldor boʻlgan har qanday kishining burchi hisoblanadi.

“Qoʻqon olimpiadasi” umumtaʼlim maktablarining 5, 6, 7, 8, 9 va 10, 11-sinflari, akademik litseylarning 1, 2-bosqich oʻquvchilari oʻrtasida oʻtkazilishi koʻzda tutilgan.

Birinchi guruh (5, 6, 7-sinflar) oʻquvchi-talabgorlari oʻrtasida birinchi oʻrinni qoʻlga kiritgan nomzodga «Neksiya» avtomobili, ikkinchi guruh (8, 9-sinflar) oʻrtasida birinchilikni egallaganga ham «Neksiya», uchinchi guruhda (10, 11-sinflar, akademik litseyning 1, 2-bosqich) birinchilik uchun esa “Kobalt” avtomobili ­sovgʻa qilinadi.

Bugun Buxoro davlat universitetida matematika fanidan ‘’Qo’qon olimpiadasi’’ o’tkazildi. Unda 380 dan ortiq maktab o’quvchilari qatnashdilar. Olimpiadadan oldin BuxDU O’quv ishlari bo’yicha prorektori M.I.Daminov Qo’qon universiteti mas’ullari bilan uchrashuv o’tkazdi. Uchrashuvda test sinovlari o‘tkaziladigan joylarga qo‘yiladigan umumiy talablar asosida shart-sharoitlar hozirlashga doir masalalar ko’rib chiqildi. Bunga ko’ra  Buxoro davlat universitetida maxsus chora-tadbirlar rejasi ishlab chiqilgan bo’lib IIB, SSB, FVV hamda XTB xodimlari hamjihatlikda hududda amalga oshiriladigan ishlarni belgilab oldilar. Olimpiadani yuqori saviyada o‘tkazish maqsadida ishchi guruh tuzilib, barcha mas’ullarga vazifalar taqsimlandi.

BuxDU Matbuot xizmati