19-fevral kuni universitetda Xalqaro taʼlim bo‘yicha Amerika Kengashlari (American Councils for International Education) dasturlarining taqdimoti bo‘lib o‘tdi.
Taqdimotda universitetning barcha fakultetlarning professor-o‘qituvchilar jamoasi hamda talabalaridan vakillar, shuningdek turli jamoat tashkilotlaridan qatnashchilar ishtirok etishdi. Tadbirni ochib bergan xalqaro hamkorlik bo‘yicha prorektor A.Jo‘rayev xalqaro hamkorlik sohasida olib borilayotgan ishlar haqida maʼlumot berar ekan, AQSH taʼlim dasturlarining rolini ham alohida taʼkidlab o‘tdi. Xususan, so‘nggi 2 yil davomida amerikalik o‘qituvchilar faoliyat olib borayotganligi, UNICEN dasturi doirasida Vayoming universiteti bilan hamkorlik qilinayotgani, joriy yilgi Faculty Enrichment Program tanlovlarida BuxDUdan 3 nafar o‘qituvchi muvaffaqiyat qozonganligi maʼlum qilindi.
Amerika Kengashlari mutaxassisi B.To‘ychiyev rahbarligidagi mehmonlar 10 dan ortiq taʼlim dasturlari haqida to‘liq maʼlumot berib o‘tishdi. Ushbu dasturlarda ishtirok etib, sovrindor bo‘lishgan o‘qituvchilar va talabalar o‘z tajribalari bilan o‘rtoqlashishdi. Fulbrayt dasturi orqali 10 oy muddatda universitetda ingliz tilini o‘qitishga ko‘maklashish uchun yaqinda yetib kelgan Sara Chatta ham o‘z fikrlarini bildirib, barchani Amerika Kengashi tanlovlarida ishtirok etishga chaqirdi.
Tadbir so‘ngida qiziquvchilarning barcha savollariga javob berildi.
Amerika Kengashining rasmiy veb-sahifasi: https://www.americancouncils.org
BuxDU Matbuot xizmati
