BuxDUda O‘zbekiston yoshlar ittifoqi boshlang‘ich tashkiloti yetakchisi saylovi bo‘lib o‘tdi

Yoshlarning ijtimoiy faolligini oshirish, navqiron avlodni har tomonlama barkamol insonlar etib tarbiyalash, vatanparvar va milliy qadriyatlarimizga hurmat ruhida ulg‘aytirish borasida O‘zbekiston yoshlar ittifoqi zimmasiga katta vazifalar yuklatilgan. Bunda ushbu tuzilmaning quyi tizimlari, jumladan, oliy o‘quv yurtlaridagi boshlang‘ich tashkilot yetakchilaridan katta mas’uliyat talab etiladi.

Prezidentimizning joriy yil 5-iyuldagi “Yoshlarga oid davlat siyosati samaradorligini oshirish va O‘zbekiston yoshlar ittifoqi faoliyatini qo‘llab-quvvatlash to‘g‘risida”gi farmoni va 18-iyuldagi “Yoshlar ittifoqi faoliyatini takomillashtirishga oid kompleks chora-tadbirlar to‘g‘risida”gi qaroriga muvofiq, oliy ta’lim muassasalarida yoshlar manfaatlarining haqiqiy himoyachisi bo‘lishga erishish, ta’lim sifatini yuksaltirishga doir jarayonni o‘rganish hamda muassasada jamoatchilik nazoratini o‘rnatishga alohida e’tibor qaratilmoqda.

Mazkur hujjatlar asosida O‘zbekiston Respublikasi Oliy va o‘rta maxsus ta’lim vazirligi va O‘zbekiston yoshlar ittifoqi markaziy kengashining qo‘shma qarori tasdiqlandi. Unga ko‘ra, shu kunlarda oliy ta’lim muassasalarida tashkilot yetakchilari saylovi o‘tkazilayotir.

Buxoro davlat universitetida ham to‘g‘ridan-to‘g‘ri ovoz berish yo‘li bilan yetakchi saylandi.

– Yetakchi saylovi talabalar va yosh professor-o‘qituvchilar uchun o‘ziga xos kichik demokratiya maktabi vazifasini o‘tashi shubhasiz, – deydi universitetning ma’naviyat va ma’rifat ishlari bo‘yicha prorektori O.Qodirov. – Tadbirga puxta tayyorgarlik ko‘rildi. Fakultetlarda yetakchilik lavozimiga ko‘rsatilgan nomzodlarning dasturi tanishtirildi. Bu ularga o‘zlari munosib, deb bilgan yetakchini tanlash imkonini berdi.

Saylovda ishtirok etgan talabalar va yosh xodimlarning 52 foiz ovozini olgan universitetning akademik litsey va kasb-hunar kollejlari bilan ishlash bo‘limi boshlig‘i J.Ergashev yoshlar ittifoqi boshlang‘ich tashkilotining rahbari etib saylandi.

– Bugungi shiddat bilan o‘zgarayotgan davr har birimizdan jamiyatda munosib o‘rin topish, oldimizga qo‘yilayotgan vazifalarni hal etishda fidoyilik ko‘rsatishni taqozo etmoqda, – deydi universitet yoshlari yetakchisi J.Ergashev. – Prezidentimiz tomonidan ilgari surilgan 2017-2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi asosida ishlab chiqilgan dasturimizda yoshlar huquqiy madaniyatini oshirish, ularda faol fuqarolik pozitsiyasini mustahkamlash, yosh iste’dodlarni qo‘llab-quvvatlash doirasida “Yoshlar klubi”, turli to‘garaklar, xorijiy tillarni o‘rgatish bo‘yicha kurslar ochish, huquqbuzarlik va jinoyatchilikning oldini olish maqsadida universitet hududida “Yosh posbonlar” ko‘ngillilar guruhi faoliyatini yo‘lga qo‘yish ko‘zda tutilgan.

Universitetda yosh avlod vakillarini keng jalb etgan holda “Biz Vatanga tayanchmiz”, "Bizning eng katta tayanchimiz va suyanchimiz, hal qiluvchi kuchimiz – yoshlar!” shiori ostida ochiq muloqot, davra suhbatlari va aksiyalar o‘tkazilmoqda.

Buxoro muhandislik-texnologiya, Buxoro tibbiyot institutlarida o‘tkazilgan saylovlarda ham O‘zbekiston yoshlar ittifoqining boshlang‘ich tashkiloti yetakchiligiga munosib nomzodlar saylandi.



Erkin Yodgorov, O‘zA

Bog`lanish

Address: Muljal: Buxoro shahri Abu Ali ibn Sino nomidagi favvoralar maydoni

Manzil: Buxoro sh. Muhammad Iqbol ko`chasi 11 uy

Phone: Telefon: 8(365) 221-29-14

Fax: Fax: 8(365) 221-27-07

Avtobus yo`nlaishlai: 33,86, 88, 6, 77, 10, 76, 72, 25

Google xaritada