«
»

BuxDU delegasiyasining Italiya OTMlariga tashrifi haqida

Buxoro davlat universiteti rektori, prof. A.A.To’laganov boshchiligidagi delegasiya joriy yilning 27 sentyabr-2 oktabr kunlari Italiyaning Piza va Paduya universitetlarida rasmiy safarda bo’lib qaytdi. Safar O’zbekiston Respublikasi Prezidentining 20.04.2017 yildagi “Oliy ta’lim tizimini yanada rivojlantirish chora-tadbirlari to’g’risida” PQ-2909 sonli hamda 24.07.2017 yildagi “Oliy ma’lumotli mutaxassislar tayyorlash sifatini oshirishda iqtisodiyot sohalari va tarmoqlarining ishtirokini yanada kengaytirish chora-tadbirlari to’g’risida” PQ-3151 qarorlarida belgilangan vazifalarni amalga oshirish doirasida tashkil qilindi.

         29 sentyabr kuni Piza universiteti vakillari bilan uchrashuv o’tkazildi. BuxDU rektori A.A.To’laganov tomonidan O’zbekistonda oliy ta’lim sohasida amalga oshirilayotgan islohotlar, erishilgan muvaffaqiyatlar, kelgusi rejalar hamda BuxDU haqida ma’lumotlar berildi. O’zaro hamkorlik o’rnatish masalasi, xususan professor-o’qituvchilar, tadqiqotchilar hamda talabalar almashinuvini yo’lga qo’yish, ilmiy sohada hamkorlik qilish bo’yicha takliflarni bildirdi.

         Piza universiteti rektori Paolo Mankarella ham Piza universiteti faoliyati bilan tanishtirib o’tdi. Ayni paytda Piza universiteti Italiyaning va jahonning etakchi universitetlaridan biri bo’lib, turli reytinglarda doimiy ravishda yuqori 300 talikdan o’rin egallab kelmoqda. Rektor P.Mankarella Piza universitetida xalqaro hamkorlikka alohida e’tibor qaratilib, Buxoro davlat universiteti va mamlakatimizning boshqa OTMlari bilan aloqalarni kengaytirishdan manfaatdor ekanliklarini ma’lum qildi.

         Professor Ann Katerin Ayzeks Piza universiteti boshqaruvida O’zbekiston OTMlari bilan bir qator Tempus va Erasmus+loyihalari muvaffaqiyatli ravishda amalga oshirilganligini ta’kidlab o’tdi.

         So’nggi yillarda ushbu universitetda BuxDUdan 1 nafar talaba ta’lim olish, 3 nafar o’qituvchi malaka oshirish hamda 2 nafar tadqiqotchi ilmiy safarlarda bo’lib qaytishgan. Ayni paytda yana 2 nafar yosh o’qituvchi ilmiy safar muddatini o’tashmoqda. Delegasiya a’zolari ushbu o’qituvchilarga rahbarlik qilayotgan prof. D.Bini hamda D.Romanolar bilan ham uchrashishdi. Professorlar BuxDU vakillarining yuqori darajada ilmiy va chet tili ko’nikmalariga ega ekanliklarini bildirdilar.

         Piza universiteti xalqaro hamkorlik boshqarmasi boshlig’i Paola Kapellini mavjud hamkorlik aloqalari asosida Anglashuv memorandumi imzolashga tayyor ekanliklarini bildirib, ushbu kelishuvlarni imzolash va amalga oshirishning huquqiy mexanizmlari haqida ma’lumot berdi.

         Xalqaro aloqalar bo’yicha prorektor prof. Franchesko Marselloni Piza universitetiga O’zbekistondan professor-o’qituvchilar hamda ilmiy tadqiqotchilarni taklif qilish, shuningdek Piza universiteti professorlarini O’zbekistonga yuborish masalalari muhokama qilinganidan mamnunligini ifoda etib, ushbu tashabbuslarni to’liq qo’llab-quvvatlashlarini ma’lum qildi.

         Turizm bo’yicha bakalavriat va magistratura dasturlari kengashi raisi prof. Enrika Lemmi bilan turizm yo’nalishida hamkorlikda o’quv kurslarini tashkil etish va ilmiy yo’nalishlarda hamkorlik qilish masalalari muhokama qilindi.

         Shu kunning o’zida BuxDU delegasiyasi Piza shahrida tashkil qilingan “Tadqiqotchilar kechasi”da ishtirok etdi. Tadbirlar doirasida Pizada faoliyat ko’rsatayotgan OTMlar hamda ilmiy tadqiqot muassasalarining innovasion g’oyalar va ishlanmalari ko’rgazmalari, ochiq ma’ruzalar, ko’rgazmalar tashkil etildi.

         Uchrashuvlar natijasida quyidagilarga kelishildi:

  1. Piza universiteti bilan Buxoro davlat universiteti o’rtasida Anglashuv memorandumi imzolanib, u hamkorlikning barcha jabhalarini qamrab oladi (muddat: oktabr 2017 y.).
  2. 2.    Piza universiteti BuxDU professor-o’qituvchilari va ilmiy tadqiqotchilarining hujjatlarini ko’rib chiqib, joriy o’quv yili davomida qabul qilinishi mumkin bo’lgan nomzodlarni belgilaydi (muddat: oktabr-noyabr 2017 y.). Joriy o’quv yili davomida BuxDUning 3 nafar vakilini qabul qilishga kelishildi.
  3. BuxDU tomonidan taqdim qilinadigan ehtiyoj ma’lumoti asosida Piza universiteti BuxDUga yuborilishi mumkin bo’lgan professor-o’qituvchilar nomzodini aniqlashda yordam ko’rsatadi (muddat: o’quv yili davomida).
  4. Piza universiteti Turizm yo’nalishida ilmiy va uslubiy hamkorlik o’rnatilishini to’liq qo’llab-quvvatlaydi, hamkorlikdagi ilmiy tadqiqotlar mavzulari belgilab olinadi (muddat: oktabr-noyabr 2017 y.).
  5. Piza universiteti 2011 yildan beri tashkil qilib kelinayotgan “Tadqiqotchilar kechasi” innovasion g’oya va ishlanmalar ko’rgazmalarini tashkil qilish borasida ma’lumotlarni taqdim etadi (muddat: oktabr 2017 y.)  

 

         2oktabr kuni Paduya universiteti vakillari bilan uchrashuv o’tkazildi. BuxDU rektori A.A.To’laganov tomonidan O’zbekistonda oliy ta’lim sohasida amalga oshirilayotgan islohotlar, erishilgan muvaffaqiyatlar, kelgusi rejalar hamda BuxDU haqida ma’lumotlar berildi. O’zaro hamkorlik o’rnatish masalasi, xususan professor-o’qituvchilar, tadqiqotchilar hamda talabalar almashinuvini yo’lga qo’yish, ilmiy sohada hamkorlik qilish bo’yicha takliflarni bildirdi.

         Paduya universiteti rektori, prof. Rozario Rissuto O’zbekistondagi islohotlardan xabardor ekanliklarini, yaqinda Italiya tashqi ishlar vazirligi va Ta’lim vazirligi ishtirokida o’tkazilgan yig’ilishda Italiyaning hamkorlikni kengaytirish bo’yicha strategik hamkorlari qatorida O’zbekiston ham sanab o’tilganligini ta’kidladi.

         Xalqaro aloqalar bo’yicha prorektor prof. Alessandro Pakkagnela Paduya universiteti faoliyati bilan tanishtirdi. Ta’kidlanishicha, Paduya universiteti Italiyada qabul qilingan 12 ta’lim sohasining 6 tasida 1-o’rinda, 4  tasida 2- va 3-o’rinlarda turishini ma’lum qildi. Shuningdek, Paduya universiteti jahon reytinglarida doimiy ravishda yuqori 300 talikdan o’rin egallab kelmoqda. Prorektor Pakkagnela Paduya universitetida xalqaro hamkorlikka alohida e’tibor qaratilib, Buxoro davlat universiteti va mamlakatimizning boshqa OTMlari bilan aloqalarni kengaytirishdan manfaatdor ekanliklarini ma’lum qildi. O’zaro Anglashuv memorandumi imzolashga tayyor ekanliklarini bildirib o’tdi.

         Prof. Edi Defranchesko BuxDU va UrDU bilan hamkorlik mavjudligini mamnuniyat bilan qayd etib o’tdi.

         Xalqaro aloqalar bo’limi boshlig’i Roberta Rasa BuxDUdan professor-o’qituvchilar va tadqiqotchilarni qabul qilish mexanizmi haqida fikr bildirdi.

         Prof. Alessandra Petrina ingliz tilida mutaxassislik fanlarini o’qitish Italiya uchun ham muhim ekanligini qayd etib, Paduya universiteti til markazida aynan shu yo’nalishda maxsus kurslar tashkil qilinganligini, ushbu kurslarda professor-o’qituvchilar malaka oshirishlari ma’lum qildi hamda O’zbekiston oliy ta’limi uchun ham malaka oshirish kurslarini tashkil qilish mumkinligini ta’kidladi.

         Lingvistika va adabiyot kafedrasi professori Klaudiya Kriveler BuxDUdan professor-o’qituvchilarni malaka oshirish uchun qabul qila olishlarini bildirdi. Shuningdek, maxsus kurslarni o’tishda yordam berish uchun rus tili bo’yicha mutaxassis uzatishni so’rab murojaat qildi.

         Delegasiya a’zolari Paduya universitetiga tegishli Botanika bog’iga ham tashrif buyurishdi.

         Uchrashuvlar natijasida quyidagilarga kelishildi:

  1. Paduya universiteti bilan Buxoro davlat universiteti o’rtasida Anglashuv memorandumi imzolanib, u hamkorlikning barcha jabhalarini qamrab oladi (muddat: oktabr 2017 y.).
  2. Paduya universiteti BuxDU professor-o’qituvchilari va ilmiy tadqiqotchilarining hujjatlarini ko’rib chiqib, joriy o’quv yili davomida qabul qilinishi mumkin bo’lgan nomzodlarni belgilaydi (muddat: oktabr-noyabr 2017 y.).
  3. Joriy o’quv yilining 2-semestrida BuxDUdan 3 nafar magistrant 5 oyga ta’lim olish uchun Erasmus+ dasturi doirasida o’qishga qabul qilinadi. Magistrantlar ta’lim olish hamda qo’shma rahbarlik asosida magistrlik dissertasiyalarini tayyorlash imkoniyatiga ega bo’ladilar.
  4. Paduya universiteti Qishloq xo’jaligi va veterinariya fakulteti professori Edi Defranchesko joriy o’quv yili 2-semestrida BuxDU va UrDUda dars o’tish, ilmiy hamkorlik loyihalarini tayyorlash hamda viloyatdagi qishloq xo’jaligi tashkilotlari faoliyati bilan tanishish maqsadida Erasmus+ dasturi doirasida tashrif buyuradi.
  5. BuxDU tomonidan taqdim qilinadigan ehtiyoj ma’lumoti asosida Piza universiteti BuxDUga yuborilishi mumkin bo’lgan professor-o’qituvchilar nomzodini aniqlashda yordam ko’rsatadi (muddat: o’quv yili davomida).
  6. Piza universiteti Turizm yo’nalishida ilmiy va uslubiy hamkorlik o’rnatilishini to’liq qo’llab-quvvatlaydi, hamkorlikdagi ilmiy tadqiqotlar mavzulari belgilab olinadi (muddat: oktabr-noyabr 2017 y.).

         

Rektor                                                A.A. To’laganov

Shartnoma to`liovlari Telegramda

Bog`lanish

Address: Muljal: Buxoro shahri Abu Ali ibn Sino nomidagi favvoralar maydoni

Manzil: Buxoro sh. Muhammad Iqbol ko`chasi 11 uy

Phone: Telefon: 8(365) 221-29-14

Fax: Fax: 8(365) 221-27-07

Avtobus yo`nlaishlai: 33,86, 88, 6, 77, 10, 76, 72, 25

Google xaritada