«
»

Oliy malakali ilmiy va ilmiy-pedagog kadrlarni tayyorlash va attestasiyadan o’tkazish tartibini yanada takomillashtish chora-tadbirlari to’g’risida

O’zbekiston Respublikasi Prezidentining «Oliy o’quv yurtidan keyingi ta’lim tizimini yanada takomillashtirish to’g’risida» 2017 yil 16 fevraldagi PF-4958-son Farmoni ijrosi yuzasidan, shuningdek O’zbekiston Respublikasi Vazirlar Mahkamasi huzuridagi Oliy attestasiya komissiyasida ekspertizadan o’tkazish hamda ilmiy darajalar beruvchi ilmiy kengashlarda dissertasiyalarni himoya qilish bilan bog’liq sarf-xarajatlarni to’lashni tartibga solish maqsadida Vazirlar Mahkamasi qaror qiladi:

1. Quyidagilar:

O’zbekiston Respublikasi Vazirlar Mahkamasi huzuridagi Oliy attestasiya komissiyasida ilmiy darajalar olish yuzasidan dissertasiyalarni ekspertizadan o’tkazish bilan bog’liq sarf-xarajatlarni to’lash tartibi to’g’risidagi Nizom 1-ilovaga muvofiq;

Ilmiy darajalar beruvchi ilmiy kengashlarda dissertasiyalarni himoya qilish bilan bog’liq sarf-xarajatlarni to’lash tartibi to’g’risidagi Nizom 2-ilovaga muvofiq tasdiqlansin.

2. O’zbekiston Respublikasi Hukumatining 3-ilovaga muvofiq ayrim qarorlariga o’zgartirish va qo’shimchalar kiritilsin.

3. O’zbekiston Respublikasi Hukumatining 4-ilovaga muvofiq ayrim qarorlari o’z kuchini yo’qotgan deb hisoblansin.

4. O’zbekiston Respublikasi Vazirlar Mahkamasi huzuridagi Oliy attestasiya komissiyasi hamda boshqa manfaatdor vazirliklar va idoralar o’zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

5. Mazkur qarorning bajarilishini nazorat qilish O’zbekiston Respublikasi Vazirlar Mahkamasi huzuridagi Oliy attestasiya komissiyasi raisi A.T. Yusupov zimmasiga hamda O’zbekiston Respublikasi Vazirlar Mahkamasining Ta’lim, ilm-fan va yoshlar siyosati masalalari axborot-tahlil departamentiga yuklansin.

O’zbekiston Respublikasining Bosh vaziri A. ARIPOV

Toshkent sh.,

2017 yil 22 noyabr,

937-son

Vazirlar Mahkamasining 2017 yil 22 noyabrdagi 937-son qaroriga
1-ILOVA

O’zbekiston Respublikasi Vazirlar Mahkamasi huzuridagi Oliy attestasiya komissiyasida ilmiy darajalar olish yuzasidan dissertasiyalarni ekspertizadan o’tkazish bilan bog’liq sarf-xarajatlarni to’lash tartibi to’g’risida

NIZOM

1-bob. Umumiy qoidalar

1. Mazkur Nizom O’zbekiston Respublikasi Vazirlar Mahkamasi huzuridagi Oliy attestasiya komissiyasida (keyingi o’rinda OAK deb ataladi) ilmiy darajalar olish yuzasidan dissertasiyalarni ekspertizadan o’tkazish bilan bog’liq sarf-xarajatlarni to’lash tartibini belgilaydi.

2. OAK ekspert kengashlarining shakllantirilishi va faoliyati tartibi qonunchilik tomonidan belgilanadi.

3. OAK ekspert kengashlari raislari, ilmiy kotiblari va ekspertlarining ilmiy darajalar olish yuzasidan dissertasiyalarni ekspertizadan o’tkazish uchun mehnatiga haq to’lash OAK tomonidan, har yili «Fan» sohasi bo’yicha joriy xarajatlar uchun ajratiladigan byudjet mablag’lari doirasida amalga oshiriladi.

4. OAK ekspert kengashlari raislari, ilmiy kotiblari va ekspertlarining ilmiy darajalar olish yuzasidan dissertasiyalarni ekspertizadan o’tkazish uchun mehnatiga haq to’lash qonunchilikka muvofiq, ular tomonidan OAK bilan belgilangan tartibda tuzilgan shartnomalar asosida amalga oshiriladi.

2-bob. OAK ekspert kengashlari raislari, ilmiy kotiblari va ekspertlarining ilmiy darajalar olish yuzasidan dissertasiyalarni ekspertizadan o’tkazish uchun mehnatiga haq to’lash tartibi va miqdorlari

5. OAK ekspert kengashlari a’zolarining ilmiy darajalar olish yuzasidan dissertasiyalarni ekspertizadan o’tkazish uchun mehnatiga haq to’lash soatbay shartlarda quyidagi tartibda amalga oshiriladi:

ekspert kengashi raisi va ilmiy kotibiga — ekspert kengashining har bir o’tkazilgan majlisi uchun, amalda uni o’tkazish uchun sarflangan vaqtdan kelib chiqqan holda, biroq har bir majlis uchun 5 soatdan ko’p emas;

ekspertlarga — fan doktori (DSc) ilmiy darajasini olish yuzasidan dissertasiyani ekspertizadan o’tkazish uchun 8 soat hamda falsafa doktori (PhD) ilmiy darajasini olish yuzasidan dissertasiyani ekspertizadan o’tkazish uchun 5 soat hisobidan.

6. OAK ekspert kengashlari majlislarini o’tkazish jadvali OAK bosh ilmiy kotibi tomonidan tasdiqlanadi.

7. Ilmiy daraja olish yuzasidan bir dissertasiya ekspertizasi ekspert kengashi raisi tayinlaydigan bir ekspert tomonidan o’tkaziladi.

Ilmiy daraja olish yuzasidan dissertasiyani ekspertizadan o’tkazish natijalari bo’yicha bahsli vaziyatlar vujudga kelganda, ekspert kengashi raisi tomonidan OAK raisi bilan kelishilgan holda mazkur dissertasiyani boshqa ekspert tomonidan takroran ekspertizadan o’tkazish tayinlanib, uning mehnati uchun haq to’lash ushbu Nizomning 5-bandi uchinchi xatboshida nazarda tutilgan tartibda amalga oshiriladi.

8. OAK ekspert kengashi raisi, ilmiy kotibi va ekspertlarining ilmiy darajalar olish yuzasidan dissertasiyalarni ekspertizadan o’tkazish uchun mehnatiga soatbay haq to’lash miqdori rahbar kadrlar va mutaxassislar malakasini oshirish bo’yicha ta’lim muassasalari (kurslari) tinglovchilariga o’quv mashg’ulotlari o’tkazadigan shaxslar uchun to’lanishi nazarda tutilgan soatbay ish haqi miqdoriga tenglashtiriladi.

9. OAK ekspert kengashlari raisi, ilmiy kotibi va ekspertlari mehnatiga to’lanadigan ish haqi miqdorini belgilash maqsadida ularning ekspert kengashi majlislarida hamda ilmiy darajalar olish yuzasidan dissertasiyalarni ekspertizadan o’tkazishdagi ish vaqtini hisobga olish OAK mas’ul xodimlari tomonidan amalga oshiriladi.

10. Chet el fuqarolari tomonidan ilmiy darajalar olish yuzasidan xorijda bajarilgan dissertasiyalar ekspertizasi to’lov asosida OAK ekspert kengashi tomonidan amalga oshiriladi.

Chet el fuqarolari tomonidan ilmiy darajalar olish yuzasidan xorijda bajarilgan dissertasiyalarini ekspertizadan o’tkazish uchun to’lov miqdori OAK tomonidan amaldagi sarf-xarajatlardan kelib chiqqan holda belgilanadi.

To’lov chet el fuqarosi tomonidan OAKning byudjetdan tashqari g’aznachilik hisob raqamiga belgilangan tartibda kiritiladi.

Chet el fuqarolari tomonidan ilmiy darajalar olish yuzasidan xorijda bajarilgan dissertasiyalarini ekspertizadan o’tkazish uchun OAK ekspert kengashi raisi, ilmiy kotibi va ekspertlari mehnatiga haq to’lash kirim qilingan to’lov hisobidan amalga oshiriladi.

3-bob. Dissertasiyalarda plagiatni aniqlash yuzasidan ekspertizadan o’tkazish va dissertasiyalar mavzularini chop etish uchun sarf-xarajatlarni to’lash tartibi va miqdorlari

11. OAKda ilmiy darajalar olish yuzasidan dissertasiyalarda plagiatni aniqlash yuzasidan elektron ekspertiza o’tkazish va «OAK Byulleteni» jurnalida dissertasiyalar mavzularini e’lon qilish uchun sarf-xarajatlarni to’lash quyidagilar hisobidan amalga oshiriladi:

talabgor mehnat faoliyatini amalga oshirayotgan yoki dissertasiya bajarilgan tashkilot va muassasalarning byudjetdan tashqari mablag’lari hisobidan, — dissertasiya ilmiy darajalarni beruvchi ilmiy kengash tomonidan talabgor oliy o’quv yurtidan keyingi ta’lim institutida o’qish davrida qabul qilingan taqdirda;

talabgorning o’z mablag’lari, shuningdek, qonunchilikda taqiqlanmagan boshqa manbalar hisobidan, — dissertasiya ilmiy darajalarni beruvchi ilmiy kengash tomonidan talabgor oliy o’quv yurtidan keyingi ta’lim institutida o’qish muddati tugaganidan so’ng qabul qilingan taqdirda.

12. OAK tomonidan quyidagi to’lov miqdorlari belgilanadi:

OAKda fan doktori (DSc) ilmiy darajasini olish yuzasidan dissertasiyada plagiatni aniqlash yuzasidan elektron ekspertiza o’tkazish uchun — eng kam ish oylik haqining ikki baravari miqdorida;

OAKda falsafa doktori (PhD) ilmiy darajasini olish yuzasidan dissertasiyada plagiatni aniqlash yuzasidan elektron ekspertiza o’tkazish uchun — eng kam oylik ish haqining bir baravari miqdorida;

«OAK Byulleteni» jurnalida dissertasiyalar mavzularini e’lon qilish uchun — eng kam oylik ish haqining 25 foizi miqdorida.

OAKda ilmiy darajalar olish uchun dissertasiyalarda plagiatni aniqlash yuzasidan elektron ekspertiza o’tkazish va «OAK Byulleteni» jurnalida dissertasiyalar mavzularini e’lon qilish uchun to’lov OAKning byudjetdan tashqari g’aznachilik hisob raqamiga belgilangan tartibda kirim qilinadi.

4-bob. Yakunlovchi qoida

13. OAK ekspert kengashlari a’zolari mehnati uchun ish haqi miqdori, ular bajargan ish hajmidan kelib chiqib, to’g’ri va asosli belgilanishi yuzasidan mas’uliyat OAK ekspert kengashlari raislari va mas’ul xodimlari zimmasiga yuklanadi.

Vazirlar Mahkamasining 2017 yil 22 noyabrdagi 937-son qaroriga
2-ILOVA

Ilmiy darajalar beruvchi ilmiy kengashlarda dissertasiyalarni himoya qilish bilan bog’liq sarf-xarajatlarni to’lash tartibi to’g’risida

NIZOM

1-bob. Umumiy qoidalar

1. Mazkur Nizom ilmiy darajalar beruvchi ilmiy kengashlarda dissertasiyalarni himoya qilish bilan bog’liq sarf-xarajatlarni to’lash tartibini belgilaydi.

2. Ilmiy darajalar beruvchi ilmiy kengashlarda dissertasiyalarni himoya qilish bilan bog’liq sarf-xarajatlar quyidagilardan iborat bo’ladi:

ilmiy darajalar olish yuzasidan dissertasiyalarga opponentlik uchun;

ilmiy darajalar olish yuzasidan dissertasiyalar avtoreferatlarini chop etish va yuborish uchun;

boshqa shaharlik opponentlarning yo’lkira, yashash xarajatlari va sutkalik pullarini to’lash uchun sarf-xarajatlarni qoplash uchun;

ilmiy darajalar olish yuzasidan dissertasiyalar himoyasini stenografiya qilish uchun.

3. Ilmiy darajalar beruvchi ilmiy kengashlarda dissertasiyalarni himoya qilish bilan bog’liq sarf-xarajatlarni to’lash quyidagilar hisobidan amalga oshiriladi:

talabgor mehnat faoliyatini amalga oshirayotgan yoki dissertasiya bajarilgan tashkilot va muassasalarning byudjetdan tashqari mablag’lari hisobidan, — dissertasiya ilmiy darajalarni beruvchi ilmiy kengash tomonidan talabgor oliy o’quv yurtidan keyingi ta’lim institutida o’qish davrida qabul qilingan taqdirda;

talabgorning o’z mablag’lari, shuningdek, qonunchilikda taqiqlanmagan boshqa manbalar hisobidan, — dissertasiya ilmiy darajalarni beruvchi ilmiy kengash tomonidan talabgor oliy o’quv yurtidan keyingi ta’lim institutida o’qish muddati tugaganidan so’ng qabul qilingan taqdirda.

4. Ilmiy darajalar olish yuzasidan dissertasiyalarga opponentlik hamda boshqa shaharlik opponentlarning yo’lkira, yashash xarajatlari va sutkalik to’lovlari uchun sarf-xarajatlarni qoplash uchun mablag’lar, kelgusida ushbu xarajatlar to’lanishi uchun, huzurida tegishli ilmiy darajalar beruvchi ilmiy kengash faoliyat yuritayotgan muassasaning byudjetdan tashqari g’aznachilik hisob raqamiga belgilangan tartibda o’tkaziladi.

2-bob. Ilmiy darajalar olish yuzasidan dissertasiyalarga opponentlik qilish

5. Ilmiy darajalar olish yuzasidan dissertasiyalarga opponentlarni tayinlash tartibi, ilmiy darajalar beruvchi ilmiy kengash faoliyatini tartibga soluvchi normativ-huquqiy hujjat bilan belgilanadi.

6. Ilmiy darajalar olish yuzasidan dissertasiyalarga opponentlik qilish uchun opponentlarning mehnatiga ish haqi to’lash soatbay asosda quyidagi hisobda amalga oshiriladi:

har bir opponent uchun 8 soatdan — fan doktori (DSc) ilmiy darajasini olish yuzasidan bir dissertasiyaga opponentlik qilish uchun;

har bir opponent uchun 6 soatdan — falsafa doktori (PhD) ilmiy darajasini olish yuzasidan bir dissertasiyaga opponentlik qilish uchun.

7. Ilmiy darajalar olish yuzasidan dissertasiyalarga opponentlik qilish uchun opponentlarning mehnatiga soatbay haq to’lash miqdori, rahbar kadrlar va mutaxassislarning malakasini oshirish bo’yicha ta’lim muassasalari (kurslari) tinglovchilariga o’quv mashg’ulotlari o’tkazadigan shaxslar uchun to’lanishi nazarda tutilgan soatbay ish haqi miqdoriga tenglashtiriladi.

8. Ilmiy darajalar olish yuzasidan dissertasiyalarga opponentlik qilish uchun opponentlarning mehnatiga soatbay haq to’lash, huzurida tegishli ilmiy darajalar beruvchi ilmiy kengash faoliyat yuritayotgan muassasa tomonidan, tuzilgan mehnat shartnomalari asosida amalga oshiriladi.

3-bob. Ilmiy darajalar olish yuzasidan dissertasiyalar avtoreferatlarini chop etish va yuborish

9. Ilmiy darajalar olish yuzasidan dissertasiyalar avtoreferatlarini tayyorlash tartibi, avtoreferatlarning talab qilingan nusxalari miqdori, shuningdek, ular yuboriladigan muassasalar va tashkilotlar ro’yxati, ilmiy darajalar beruvchi ilmiy kengash faoliyatini tartibga soluvchi normativ-huquqiy hujjat bilan belgilanadi.

10. Ilmiy darajalar olish yuzasidan dissertasiyalar avtoreferatlarini chop etish nashr etuvchi tashkilotlar tomonidan ilmiy darajalar olish uchun talabgorlar talabnomalari asosida, ushbu tashkilotlarda belgilangan narxlar (tariflar) bo’yicha amalga oshiriladi.

11. Ilmiy darajalar olish yuzasidan dissertasiyalar avtoreferatlarini yuborish, pochta xizmati bo’linmalari tomonidan ilmiy darajalar olish uchun talabgorlar talabnomalari asosida, ushbu pochta xizmati bo’linmalarida belgilangan narxlar (tariflar) bo’yicha amalga oshiriladi.

12. Ilmiy darajalar olish yuzasidan dissertasiyalar avtoreferatlarini chop etish va yuborish uchun sarf-xarajatlarni to’lash, mablag’larni belgilangan tartibda bevosita tegishli nashriyot muassasalari va pochta xizmati bo’linmalariga o’tkazish (kirim qilish) orqali amalga oshiriladi.

4-bob. Boshqa shaharlik (xorijlik) opponentlarning yo’lkira, yashash xarajatlari va sutkalik to’lovlari uchun sarf-xarajatlarni qoplash

13. Ilmiy darajalar beruvchi ilmiy kengash ilmiy daraja olish yuzasidan dissertasiya himoyasi bo’yicha rasmiy opponent sifatida boshqa shaharlik yoki xorijlik mutaxassis olimni, uning roziligi bilan, belgilashi mumkin.

14. Ilmiy darajalar olish yuzasidan dissertasiyalar bo’yicha boshqa shaharlik (xorijlik) opponentlarga, huzurida tegishli ilmiy darajalar beruvchi ilmiy kengash faoliyat yuritayotgan muassasa tomonidan, dissertasiya himoyasini o’tkazish joyiga bir martalik kelib-ketish, yashash joyi ijarasi (uch kun muddatgacha) xarajatlari qoplanadi, shuningdek, sutkalik pullar (uch kun muddatgacha) to’lanadi.

Bunda boshqa shaharlik opponentlarga, ilmiy darajalar olish yuzasidan dissertasiyalar bo’yicha opponentlik qilish davrida, ularning asosiy ish joyidan,xizmat safari xarajatlari qoplanmasdan, belgilangan tartibda xizmat safari guvohnomasi beriladi hamda o’rtacha ish haqi (uch kun muddatgacha) saqlanadi.

15. Ilmiy darajalar olish yuzasidan dissertasiyalar bo’yicha boshqa shaharlik opponentlarga, yo’l xarajatlari, yashash joyi ijarasi uchun xarajatlarni qoplash, shuningdek, sutkalik pullarni to’lash, tegishli tasdiqlovchi hujjatlar asosida, respublika hududida xizmat safarlari uchun belgilangan tartib va miqdorda amalga oshiriladi.

16. Xorijlik opponentga, huzurida tegishli ilmiy darajalar beruvchi ilmiy kengash faoliyat yuritayotgan muassasa tomonidan, yo’l xarajatlari, yashash joyi ijarasi uchun xarajatlarni qoplash, shuningdek, sutkalik pullarni to’lash, O’zbekiston Respublikasi qonunchiligiga muvofiq, muassasa va xorijlik opponent o’rtasidagi shartnomalarda belgilangan miqdorda amalga oshiriladi.

5-bob. Ilmiy darajalar olish yuzasidan dissertasiyalar himoyasini stenografiya qilish

17. Ilmiy darajalar beruvchi ilmiy kengashning dissertasiya himoyasi bo’yicha majlisini o’tkazishda majlis jarayoni stenografiya qilinib, majlis stenogrammasi rasmiylashtiriladi.

18. Ilmiy darajalarga talabgorlik dissertasiyasi bo’yicha himoyani stenografiya qilish maxsus tashkilotlar tomonidan ilmiy darajalar olish uchun talabgorlar talabnomalari asosida, ushbu tashkilotlarda belgilangan narxlar (tariflar) bo’yicha amalga oshiriladi.

19. Ilmiy darajalarga talabgorlik dissertasiyasi bo’yicha himoyani stenografiya qilish uchun xarajatlarni to’lash mablag’larni belgilangan tartibda bevosita tegishli,stenografiya xizmatlarini ko’rsatgan tashkilotlarga o’tkazish (kirim qilish) orqali amalga oshiriladi.

6-bob. Yakunlovchi qoidalar

20. Ilmiy darajalar beruvchi ilmiy kengashlarda dissertasiyalarni himoya qilish bilan bog’liq sarf-xarajatlarni qoplash uchun, huzurida tegishli ilmiy darajalar beruvchi ilmiy kengash faoliyat yuritayotgan muassasalarga kelib tushayotgan mablag’larni hisobga olish va hisobotlarni yuritish mazkur muassasalar tomonidan belgilangan tartibda amalga oshiriladi.

21. Ushbu Nizom talablarini buzganlik uchun javobgarlik qonun hujjatlarida belgilangan tartibda amalga oshiriladi.

Vazirlar Mahkamasining 2017 yil 22 noyabrdagi 937-son qaroriga
3-ILOVA

O’zbekiston Respublikasi Hukumatining ayrim qarorlariga kiritilayotgan o’zgartirish va qo’shimchalar

1. O’zbekiston Respublikasining «O’zbekiston Respublikasi Vazirlar Mahkamasi huzuridagi Oliy attestasiya komissiyasi faoliyatini tashkil etish masalalari» to’g’risida 1992 yil 9 sentyabrdagi 421-son qarorida (O’zbekiston Respublikasi QT, 1992 y., № 9, 28-modda):

a) 1, 2 va 4-bandlar o’z kuchini yo’qotgan deb hisoblansin;

b) 3-bandi quyidagi tahrirda bayon etilsin:

«3. O’zbekiston Respublikasi Vazirlar Mahkamasi huzuridagi Oliy attestasiya komissiyasi raisi maqomi, maishiy, tibbiy va transport xizmati ko’rsatish shartlari bo’yicha — vazirga, bosh ilmiy kotib — vazir o’rinbosariga tenglashtirilsin.

O’zbekiston Respublikasi Fanlar akademiyasining rahbarlari va ilmiy bo’linmalari uchun nazarda tutilgan mehnatga haq to’lash shartlari ilmiy ekspertiza bilan shug’ullanuvchi rahbariyatga va bo’linmalarga nisbatan, boshqaruv organlari uchun nazarda tutilgan shartlar esa — qolgan xodimlarga nisbatan qo’llanilsin»;

v) 6-band quyidagi tahrirda bayon etilsin;

«6. OAK Toshkent shahri, akademik Yaxyo G’ulomov ko’chasi, 70-uy manzilidagi O’zbekiston Respublikasi Fanlar akademiyasi binosiga bepul foydalanish huquqi asosida joylashtirilsin»;

g) ilovalar o’z kuchini yo’qotgan deb hisoblansin.

2. O’zbekiston Respublikasi Vazirlar Mahkamasining 2000 yil 25 iyuldagi 283-son qarori (O’zbekiston Respublikasi QT, 2000 y., № 7, 42-modda)bilan tasdiqlangan Xorijiy davlatlarda ilmiy daraja olganlik to’g’risidagi hujjatlarni tan olish va nostrifikasiyalash (ekvivalentligini qayd etish) tartibi to’g’risida Nizomda:

a) 2-band quyidagi tahrirda bayon qilinsin:

«2. Xorijiy davlatlar attestasiya organlari tomonidan 1992 yil 1 yanvardan keyin O’zbekiston Respublikasi fuqarolari hamda O’zbekiston Respublikasida doimiy yashab va ishlab turgan chet el fuqarolariga fan doktori va nomzodi ilmiy darajalari berilgani haqidagi hujjatlar, shuningdek, xorijiy davlatlarda falsafa doktori (PhD) va unga tenglashtirilgan ilmiy darajalar olinganligi haqidagi hujjatlar, O’zbekiston Respublikasi Vazirlar Mahkamasi huzuridagi Oliy attestasiya komissiyasi (keyingi o’rinda OAK deb ataladi) tomonidan nostrifikasiyalanadi (qayta attestasiyadan o’tkazish asosida tenglashtiriladi)»;

b) 3-banddagi «O’zbekiston Respublikasi Oliy attestasiya komissiyasida» so’zlari «OAK» qisqartmasi bilan almashtirilsin;

v) 4-banddagi «O’zbekiston Respublikasi Oliy attestasiya komissiyasida» so’zlari «OAK» qisqartmasi bilan almashtirilsin;

g) 5-band quyidagi tahrirda bayon qilinsin:

«5. Nostrifikasiya uchun hujjatlar OAK tomonidan qabul qilinadi.

Taqdim etilgan hujjatlarni OAKning tegishli soha bo’yicha ekspert kengashi ko’rib chiqib, dissertasiyani ilmiy ekspertizadan o’tkazib, o’z xulosasini chiqaradi.

OAKning Tartib-qoida komissiyasi ekspert kengashi xulosasi va OAK Kotibiyati fikri asosida o’z tavsiyasini OAK Prezidiumi muhokamasiga taqdim etadi.

Taqdim etilgan hujjatlar, zarur hollarda, OAKning Tartib-qoida komissiyasi qarori bilan tegishli ilmiy yoki ilmiy-tadqiqot muassasaga yoxud ilmiy darajalar beruvchi ilmiy kengashga jamoaviy taqriz uchun yuborilishi mumkin»;

d) 6-band quyidagi tahrirda bayon etilsin:

«6. OAK Prezidiumining oliy malaka haqidagi hujjatlarni nostrifikasiyalash to’g’risidagi qarori qabul qilingan kundan e’tiboran ushbu hujjatlar O’zbekiston hududida kuchga kiradi. Hujjat egalariga OAK Prezidiumining qarori asosida O’zbekiston Respublikasining ilmiy daraja diplomlari beriladi»;

e) 7-band quyidagi tahrirda bayon etilsin:

«7. Fan doktori ilmiy darajasi haqidagi diplomni nostrifikasiyalash muddati uch oydan, fan nomzodi ilmiy darajasi, falsafa doktori (PhD) va unga tenglashtirilgan xorijiy mamlakatlar ilmiy darajalari diplomlarini nostrifikasiyalash muddati ikki oydan oshmasligi kerak. Zarur holatlarda ushbu hujjatlarni ko’rib chiqish muddati OAKning Tartib-qoida komissiyasi qarori bilan uch oygacha uzaytirilishi mumkin».

j) 8-band quyidagi tahrirda bayon etilsin:

«8. Ilmiy daraja haqidagi diplomlarni tenglashtirish masalalari yuzasidan OAK Prezidiumi chiqargan qarordan norozi bo’lgan da’vogar qaror chiqqan kundan boshlab ikki oy mobaynida OAKga apellyasiya shikoyati bilan murojaat qilishi mumkin»;

z) quyidagi mazmundagi 9-band qo’shilsin:

«9. Xorijiy davlatlarda berilgan ilmiy darajalar haqidagi hujjatlarni tan olish va ekvivalentligini qayd etish uchun eng kam oylik ish haqining bir baravari miqdorida to’lov undiriladi»;

i) 1-ilova matni quyidagi tahrirda bayon etilsin:

«Ilmiy daraja diplomini nostrifikasiyalash bo’yicha O’zbekiston Respublikasi Vazirlar Mahkamasi huzuridagi Oliy attestasiya komissiyasiga taqdim etiladigan attestasiya ishi hujjatlarining
RO’YXATI

1. Talabgor ish joyidan (agar u ishlayotgan bo’lsa) muassasa rahbari imzolagan yo’llanma xat yoki talabgorning imzosi notarial tasdiqlangan arizasi (1 nusxa). Xatda (arizada) talabgorning familiyasi, ismi, otasining ismi, tug’ilgan yili va joyi, ish joyi va lavozimi, shuningdek, qachon va qaysi davlatda ilmiy daraja diplomini olganligi, ilmiy darajaning rasmiy nomi, xorijda olingan hujjatning berilgan kuni, seriyasi va raqami, dissertasiya mavzusi, qaysi ixtisoslik bo’yicha himoya qilganligi haqidagi ma’lumotlar ko’rsatiladi.

2. Muassasa rahbarining tegishli ixtisoslashgan kengashga murojaatnomasi (aspirant va doktorantlar uchun esa — ularni chet elda oliy o’quv yurtidan keyingi ta’lim institutlarida o’qishga yuborish uchun buyruq) nusxasi hamda agar ilmiy ish O’zbekistonda tayyorlangan bo’lsa — O’zbekiston Respublikasi Vazirlar Mahkamasi huzuridagi Oliy attestasiya komissiyasi (keyingi o’rinlarda OAK deb ataladi) ushbu dissertasiyaning xorijiy davlatlarda himoya qilinishiga ruxsat berib, xorijiy davlatlar attestasiya organlariga yuborgan yo’llanma xatining nusxasi.

3. Ilmiy daraja diplomining notarial tasdiqlangan nusxasi.

Falsafa doktori (PhD) yoki unga tenglashtirilgan xorijiy mamlakatlarda ilmiy darajalar berilganligi haqidagi hujjatlarning O’zbekiston Respublikasi davlat tiliga notarial tartibda tasdiqlagan tarjimasi.

4. Talabgorning ish joyidan tasdiqlangan yoki uning imzosi qo’yilgan xodimlarni hisobga olish bo’yicha shaxsiy varaqasi (talabgor pasportining nusxasi ilova qilinadi).

5. Dissertasiya himoyasi o’tgan muassasaning hamda ixtisoslik nomining ilmiy kotib (agar u ishlayotgan bo’lsa) imzosi bilan tasdiqlangan yoki talabgor tomonidan imzolangan davlat tilidagi (lotin grafikasi harflari bilan) va ingliz tilidagi shakllari.

6. Mehnat daftarchasidan ko’chirma.

7. Talabgor himoya qilgan dissertasiya nusxasi va mavjud bo’lgan taqdirda — 2 nusxa avtoreferat.

8. Attestasiya ishidagi hujjatlar ro’yxati»;

k) 2-ilova matni quyidagi tahrirda bayon etilsin:

 

Mazmuni

Muddatlari (kunlarda)

Ijro uchun mas’ullar

1.

Talabgorlar xorijiy mamlakatlarda berilgan fan doktori, fan nomzodi, falsafa doktori (PhD) yoki unga tenglashtirilgan ilmiy darajalar haqidagi diplomlarni nostrifikasiya qilish uchun tegishli hujjatlarni O’zbekiston Respublikasi Vazirlar Mahkamasi huzuridagi Oliy attestasiya komissiyasiga (keyingi o’rinlarda OAK deb ataladi) taqdim etadi, shuningdek, nostrifikasiya o’tkazish uchun belgilangan to’lovni kiritishadi.

 

Da’vogarlar

2.

OAK xorijiy mamlakatlarda berilgan fan doktori, fan nomzodi, falsafa doktori (PhD) yoki unga tenglashtirilgan ilmiy darajalar haqidagi diplomlarni nostrifikasiya qilish uchun tegishli hujjatlarni qabul qiladi.

Hujjatlar taqdim etilgan kunda

OAK

3.

Taqdim etilgan hujjatlar OAKning tegishli soha bo’yicha ekspert kengashi tomonidan ko’rib chiqilib, OAKning Tartib-qoida komissiyasiga xulosa beriladi.

Belgilangan muddatda

OAKning tegishli soha bo’yicha ekspert kengashi

4.

OAKning Tartib-qoida komissiyasi ekspert kengashi xulosasi va OAK Kotibiyati fikri asosida o’z tavsiyasini OAK Prezidiumi muhokamasiga taqdim etadi.

Belgilangan muddatda

OAKning Tartib-qoida komissiyasi

4a.

Taqdim etilgan hujjatlar, zarur holatlarda, OAKning Tartib-qoida komissiyasi qarori bilan tegishli ilmiy yoki ilmiy-tadqiqot muassasasiga yoxud ilmiy darajalar beruvchi ilmiy kengashga jamoaviy taqriz uchun yuborilishi mumkin.

Belgilangan muddatda

OAKning Tartib-qoida komissiyasi, tegishli muassasalar

5.

OAK Prezidiumi fan doktori, fan nomzodi, falsafa doktori (PhD) yoki unga tenglashtirilgan ilmiy darajalar haqidagi diplomlarni nostrifikasiya qilish to’g’risida qaror qabul qiladi.

Belgilangan muddatda

OAK Prezidiumi

6.

Fan doktori, fan nomzodi, falsafa doktori (PhD) yoki unga tenglashtirilgan ilmiy darajalar haqidagi diplom egalariga OAK Prezidiumi qarori asosida O’zbekiston Respublikasining fan doktori (DSc), falsafa doktori (PhD) ilmiy darajalari diplomlari beriladi.

Belgilangan muddatda

OAK Prezidiumi

 

Vazirlar Mahkamasining 2017 yil 22 noyabrdagi 937-son qaroriga
4-ILOVA

O’zbekiston Respublikasi Hukumatining o’z kuchini yo’qotgan deb e’tirof etilayotgan ayrim qarorlari

ro’yxati

1. Vazirlar Mahkamasining «Dissertasiya ishlarining himoyasi va ekspertizasi bilan bog’liq bo’lgan moliyaviy xarajatlar haqida» 1994 yil 31 martdagi 176-son qarori.

2. Vazirlar Mahkamasining «Yilning eng yaxshi darsligi va o’quv adabiyoti muallifi» tanlovi g’oliblariga ilmiy daraja va ilmiy unvon berish to’g’risida» 2001 yil 6-iyuldagi 290-son qarori.

3. Vazirlar Mahkamasining «O’zbekiston Respublikasi Hukumatining ayrim qarorlariga pedagogik faoliyat samaradorligi va sifatini oshirish bilan bog’liq o’zgartirish va qo’shimchalar kiritish to’g’risida» 2015 yil 25 avgustdagi 246-son qarorining 2 — 4-bandlari hamda qarorga 2 va 3-ilovalar (O’zbekiston Respublikasi QT, 2015 y., 8-son, 73-modda).

 

(Qonun hujjatlari ma’lumotlari milliy bazasi, 25.11.2017 y., 09/17/937/0318-son)

 

Bog`lanish

Address: Muljal: Buxoro shahri Abu Ali ibn Sino nomidagi favvoralar maydoni

Manzil: Buxoro sh. Muhammad Iqbol ko`chasi 11 uy

Phone: Telefon: 8(365) 221-29-14

Fax: Fax: 8(365) 221-27-07

Avtobus yo`nlaishlai: 33,86, 88, 6, 77, 10, 76, 72, 25

Google xaritada