Welcome to Buxoro davlat universiteti rasmiy web sayti   Click to listen highlighted text! Welcome to Buxoro davlat universiteti rasmiy web sayti Powered By GSpeech
  • E`lonlar
  • Eng ko`p o`qilgan

Bahoriy kayfiyatga erishing

Mana nihoyat intiqib kutilgan bahor fasli ham kirib keldi. Yuzingizga urilgan yoqimli shabada, bodom gullari atrofidagi asalarilarning raqsi, to‘lib-toshib oqayotgan soylar, yer bag‘rini yorib chiqqan maysalardan yangilanish fasli kelganini sezmayapsizmi? Atrofga qarang tabiat yasharayapti. Tabiatga qo‘shilib bizning hislarimiz va ruhiyatimiz ham o‘zgarishga moyil.


Tabiat yangilanish uchun bahor faslini tanlagani bejiz emas! Aynan bahorda uyg‘onish pog‘onasida  biz ham hayotimizni tubdan o‘zgartirishga va mamnuniyat bilan bahoriy qiyofani yaratish rejalariga tayyor bo‘lamiz.
Ammo... shu yerga kelganda bizni ilk to‘siqlar qarshi oladi.  Bahorni qanchalik orziqib kutgan, uning tashrifidan naqadar quvonib, olam jahon orzular istaymiz. Ko‘klamoy o‘zining musaffo tongi, yomg‘ir tomchilar, zarrin quyosh nurlari, qushlarning yoqimli, dilni yayratuvchi chuqurlari bilan....ba‘zi bir ayollarimiz uchun tushkunlik kayfiyatini ham yetaklab keladi. Og‘ir charchoq va lanjlikni tuyish yetmaganidek, atrofimizdagi barcha narsalar g‘ashimizni keltiradi. Ko‘zgudagi “qishdan chiqqan” aksimiz esa yanada hafsalamizni pir qiladi. Xo‘sh , bunday bahoriy tushkun kayfiyatdan qanday chiqib ketish mumkin?
Keling tabiatga hamohang bo‘lishga harakat qilib ko‘ramiz.
- Bahor nimadan boshlanadi? Bahor bodom gullaridan, maysalarning ko‘karishidan, shivirlab yog‘adigan yomg‘irdan oldin momaqaldiroqning gumburlab olamga larza solishidan demoqchimisiz. Albatta haqsiz. Ammo bahor aslida ayollarning yal-yal ochilishidan, ularning yuzlaridagi nim tabassumdan boshlanadi. Qarang-ki barcha eng yoqimli va go‘zal bayramlarimiz bahor oylarida nishonlanadi. Demak, bu faslda ayolalarimiz diqqat markazda bo‘lishar ekan, kayfiyatni ko‘tarish uchun bundan-da ziyod bahona bo‘lmasa kerak.
- Endigina qishdan chiqqan, shamollash va lanjlikdan toliqqan organizmingizga tetiklik va yaxshi kayfiyat uchun nimadir yetishmayotganini his qilayapsizmi? Bahorgi toliqishni yengishga organizm uchun zarur bo‘lgan vitaminlardan foydalaning. Bunday darmondorilarni  tabbiy yalpiz, chag‘-chag‘, ismaloq, meva va turli xil ko‘katlarni ko‘proq iste‘mol qilishdan, shu bilan birga shifokorlar bilan maslahatlashib kompleksli polivitaminlarni qabul qilish orqali olishingiz mumkin.
-Yana bir kayfiyatni ko‘taradigan narsa bu –gullardir. Bozordagi gullarni nazarda tutmayapmiz. Bahor kelishi bilan hovlingizga turli xil gullardan eking. Ofis va uyingiz derazalari oldiga ko‘zni quvontiradigan uy gullaridan ko‘paytiring. Yil davomida bunday gullar kayfiyatingizni ko‘taradi.
- Jovoningizni og‘ir-og‘ir palьto va po‘stinlardan bo‘shatib, ularning o‘rniga rang-barang bahorgi kiyimlaringizni joylashtiring. Qishki kiyimlarni yig‘ishtirib qo‘yishdan oldin ularning kir bo‘lgan yoqa va yenglarini novshadil spirt yoki sirka solingan suv  bilan tozalashni unutmang.
-Endi navbat kishki bosh kiyimlariga. Ulardan ozod bo‘lgan sochlaringiz qish davomida xiralashib, to‘kilishga moyil bo‘lib qolgan. Bir necha marta tuxumli, mayonezli va qatiqli niqoblar sochlaringizga jilo beradi. Mana shundan so‘ng go‘zallik saloniga yo‘l oling. Sochlaringizni yangicha, o‘zingizga yoqadigan uslubda kestirsangiz kayfiyatingiz yanada  ko‘tariladi.
- Uy derazaridagi qalin darpardalarni yechib uyni bahorga tayyorlang. Havo ochiqligidan foydalanib ko‘rpa-to‘shaklarni va yostiqlarni quyoshga olib chiqing. Pollarni ozgina spirt yoki sirka solingan suv bilan yuving.
- Bu fasl bayramlarga boy dedik. Bayram kunlari qarindosh-urug‘lar, dugona va do‘stlaringiz bilan uchrashuvdan qochmang. Ayniqsa arazlashib qolgan insonlaringizni bayram bilan tabriklang. Ko‘rasiz , yarashib olgandan so‘ng juda yengil tortasiz. Axir yaqinlaringizning chehrasida porlagan quvonchga nima yetsin?
- Ochiq havoda ko‘proq yuring, ya‘ni sayr qiling. Ishdaman, vaqtim yo‘q demoqchimisiz? Tushlik payti dugonalaringiz bilan bo‘lar-bo‘lmas gaplarni chaq-chaqlashib o‘tirmay, tezgina ushlik qiligda 15 daqiqaga toza havoga chiqib sayr qilib keling. Sayr vaqtida chuqur-chuqur nafas oling. Muammolarni o‘ylamaslikka harakat qiling. Atrofning go‘zalligiga e‘tibor bering. Shu 15-20 daqiqani o‘zingizga bag‘ishlang. Ertalab uyg‘onish muammo bo‘layaptimi, buning yechimi bir finjon qahva emas. Dorixonalarda turli vitaminga boy, tetiklashtiruvchi gullar va o‘simliklarning quritilgani sotiladi. Mana shulardan choy damlab iching. Tetiklik uchun magniy ham juda foydali.
- Hayotda kimgadir kerakligingizni his eta olsangiz, barchaning ko‘z o‘ngida kun sayin go‘zallashib boraverasiz. Negaligini bilasizmi? Muhabbat tuyg‘usi o‘ta kuchli stressga sabab bo‘ladi. Organizmdagi garmonlar bor kuchlari bilan ishga tushganligi sababli, g‘ayrat va shijoatni his qilasiz. Natijada ... Chaqnoq nigohlar, maftunkor va hayot barq urib turgan chehra, o‘zingizni qadrlab, parvarishlashingiz va dadil karashmali qadam tashlashlar kafolatlanadi. Ba‘zi ayollarimiz “Meni hech kim sevmaydi”,-deb noto‘g‘ri fikrga boradilar. Inson negadir  sevilishdan ko‘ra sevgan vaqtida o‘zini ko‘proq baxtli his etadi. Shunday ekan  Siz avvalo yuraginzdan muhabbat, sevgi kabi hislarga joy berishingiz kerak.   
- Bahorda sumalak, halim va ko‘ksomsalar pishirish halqimizga azaliy odatdir. Buva va buvijonlarimiz birgalashib bunday ta‘omlar pishirish bilan birga Navro‘z sayillari va ko‘pkarilarni ham tashkil etishgan. Bunday marosimlar  qishdan zerikib, siqilib qolgan yaqinlar va qo‘ni-qo‘nilarning kayfiyatlarini ko‘targan, bir-birlariga samimiy qutlovlar bildirishlariga, arazlarning unutilishiga imkon yaratgan. Sizni ham shunday marosimlarga taklif etishsa, albatta boring. Axir bahor faqat go‘zal o‘lkamizga emas, qalblarimizga ham tashrif buyurdi. Agar sumalak solingan kosangizdan tosh chiqsa-ku, do‘ppingizni osmonga otavering. Demak barcha tilak va istaklaringiz ijobat bo‘lishiga shubha yo‘q.
Bahoriy kayfiyat doim hamrohingiz bo‘lsin azizlar!

                                                   Dilbar Hamdamov, psixolog.

Top
BuxDU ATM tomonidan ishlab chiqildi.
Click to listen highlighted text! Powered By GSpeech