Buxoro davlat universiteti rasmiy web sayti - Sport malikasi
Welcome to Buxoro davlat universiteti rasmiy web sayti   Click to listen highlighted text! Welcome to Buxoro davlat universiteti rasmiy web sayti Powered By GSpeech

Sport malikasi

O’jar   qiz. 

–Oyijon, opam bilan sport maktabga boraman, –dedi endigina maktabga qatnay boshlagan jajjigina Nigina xarxasha qilib.

–Hali yoshsan, bo’ying ham kichik. Katta bolalar seni masxaralaydi. Sabinacha bo’lsang, sen ham albatta, shug’ullanasan, –deya onasi shiringina jilmayib, sochlarini mehr bilan silab qo’ydi.

Lekin, Niginaning xarxashasi kun ora davom etardi. Ona esa uni aldash-suldash bilan ovora bo’lardi. Chunki qizi nimjon tug’ilganligi bois biror kor-hol bo’lmasin, degan o’y-xayol bilan rozilik bildirmasdi.

SHu tariqa, onai qizning xarxasha-yu, shirin muomilalari rosa ikki yilga cho’zildi. Ona sal yumshadi. Chunki katta qizi musobaqalarga qatnashib, nomi tillarga tusha boshlagan edi. Qolaversa, Niginaning bo’yi ancha cho’zilib, aqli ham to’lishib qolgandi.

–Mayli, borgin. Ammo, lekin qiynalsang yoki yig’lab kelsang, mendan o’pkalama, –dedi onasi nihoyat rozilik bildirib.

Shundan so’nggina, Nigina Buxoro shahridagi 1-son bolalar va o’smirlar sport maktabiga qatnay boshladi. U ham Sabina opasidek sportning yengil atletika turi bilan shug’ullanmoqchi. Avvaliga murabbiy  Rustam Rizayev uning yoshiligini inobatga olib, “qiynalib qolasan” deganday muomila qildi. Biroq qizning o’jarligi ustun kelib, murabbiyiga bahona topishiga imkon qoldirmadi. Qizning bir so’zligi Rustam akani jiddiy shug’ullantirishiga asos bo’ldi.  

G’oliblik  onlari

Har bir sport turi muayyan maqsadga yo’naltirilgan bo’lib, bolaning sog’lom rivojlanishini ta’minlaydi. Qolaversa, ishchanlik qobiliyatini oshiradi. Niginaning ham ko’p o’tmay nimjonligidan asar qolmadi. U jismonan chiniqib, tetiklasha boshladi. Ayniqsa, murabbiyi qizning qobiliyatini vaqtida payqab, u bilan jiddiy shug’ullandi. “Bir kuni undan albatta, chempion chiqadi”, deya ko’nglidan o’tkazdi. 

Lekin, oradan bir yil o’tsa hamki musobaqalarga qatnashtirmas, “hali tayyor emassan”, deb qayta-qayta mashqlarni bajartirar, tinmay yugurtirar edi. Nihoyat murabbiy kutgan kunlar keldi. 2014 yili “Konstituciya kuni” munosabati bilan tashkillashtirilgan Ko’pkurash musobaqasida ishtirok etib,  Buxoro shahar birinchiligi g’olibasi bo’ldi.

Shu-shu musobaqalar keti uzilmadi. Niginaning esa medallar soni oshib boraverdi.

–2016 yili shahrimizda Yengil atletika bo’yicha Iqtidorli bolalar va o’smirlar sport maktablari o’rtasida o’tkazilgan O’zbekiston chempionatida faol qatnashib, bronza medalini qo’lga kiritdim, –dedi u  biz bilan suhbatda, g’ururlanib. –Shundan so’ng, chempionlik sari odimlashni davom ettirdim. Oradan bir yil o’tib, Qarshi shahrida o’tkazilgan “2002-2003 yillarda tug’ilgan o’smirlar va qizlar o’rtasida”gi Respublika chempionatida bir yo’la uch turida yuqori o’rinlarni egalladim. Ya’ni, musobaqaning uch hatlab sakrash turida  birinchi, uzunlikka sakrashda ikkinchi va 4x200 estafetasida uchinchi o’rinlarni egallab, O’zbekiston chempioni degan sharafli nomga musharraf bo’ldim.

Ha, Nigina Isayeva g’oliblik nashidasini har yili surib, yangi rekord o’rnatib kelayapti. Shu yilning 13-16 mart kunlari Qarshi shahrida  “2003-2004 yillarda tug’ilgan o’smirlar va qizlar o’rtasida” o’tkazilgan navbatdagi O’zbekiston chempionatida ham lavhamiz qahramoni yuqori o’rinlarni qayd etdi: uzunlikka hamda uch hatlab sakrash turlarida mutloq g’olib bo’lib, ikkita oltin medalli bo’ldi. 4x200 estafetasida esa ikkinchi o’rinni band qildi. Shuningdek, “Umid nihollari” sport musobaqasining Yengil atletika turi bo’yicha hududiy final bosqichi g’olibi sohibasi bo’ldi.

–Maktabimizda ichki ishlar organlari xodimlari tez-tez “Yoshlar o’rtasida jinoyatchilik va huquqbuzarliklarning oldini olish” mavzusida tadbirlar o’tkazib kelishardi. Bir gal ularning orasidan ayol xodimani ko’rib, havasim keldi. Ayniqsa, ayolning o’ziga yarashgan xizmat kiyimi va shijoatkorligi meni maftun ayladi. Shu bois ham kelajakda osoyishtalik posboni bo’lishni dilimga tugib qo’ygan edim. Buni qarangki, baxtimga  Buxoro davlat universiteti qoshidagi 4-son akademik liceyi negizida IIV Buxoro Akademik litceyi   ochildi. So’rab-surishtirdim, o’quvchilar to’qqizinchi sinfdan qabul qilinarkan. Bu men uchun qulay vaziyat bo’ldi. Chunki to’qqizinchi sinfni bitirib, hujjatlarimni qaerga topshirish xususida ikkilanib yurgandim. Litcey direktoriga uchrashib, yana bir qulaylik tug’ildi. Yutuqlarimni inobatga olishib, imtiyozli ravishda o’qishga qabul qilindim, –deydi Nigina Isayeva faxrlanib.

Niginaning yana bir qirrasi

Nigina Isayeva bolaligidan yana bir san’at turi –rasm chizishga qiziqishi juda baland. Agarda, opasi sport bilan shug’ullanmaganida, u balki tasviriy san’at yo’nalishida qalam tebratardi.

Chindan ham Nigina tasviriy va amaliy san’atning nozik sirlarini o’zlashtirib, o’ziga xos uslubda ijod qilish birdan-bir maqsadi bo’lgan. Chunki yurtimizda har bir sohada yoshlarga e’tibor va g’amxo’rliklar ko’rsatilayapti. Shulardan unumli foydalanmaslik, o’zbek yoshlari uchun uyat bo’lishini u ko’nglidan o’tkazardi va shu bois jajji qo’lchalariga avval rangli qalamlar, so’ng masla, akvarel bo’yoqlari yordamida mustaqil ravishda kichik-kichik tasviriy san’at asarlarini yarata boshladi. Asosan tabiat manzaralari, natyurmort janrlarida ijod qiladi.  

Nigina chizayotgan har bir asariga o’zbek qizlariga xos iboni, urf odatlarni mehr-muhabbat bilan aks ettirishining o’zgacha jozibasi bor. Mustaqil ravishda ustoz ko’rmagan, faqat dars paytlarigina qunt bilan egallab olgan sabog’i unga yangi-yangi asarlar yaratishiga turtki bo’lardi. Qolaversa, bu sohada ham ozmi-ko’pmi yutuqlarga sazovor bo’ldi. Maqtasa arziguli. “Kamalak yulduzi” bolalar ijodiyoti festivalining viloyat bosqichida faxrli o’rinni olgani fikrimiz isbotidir. SHuningdek, Yoshlar ittifoqi tomonidan o’tkazilib kelinayotgan ko’plab tadbiru tanlovlarda faol ishtirok etmoqda.

Bundan tashqari, Nigina Isayeva pazandalik borasida ham, chevarlik borasida ham tengdoshlaridan ajralib turadi. U pishirayotgan tortlar, har xil pishiriqlar litceyda o’tkazilayotgan bayram tadbirlarida dasturxonga ko’rk bag’ishlaydi.

Yana   yutuqlar   og’ushida

–Niginaxon o’qishni boshlaganiga hali ko’p bo’lmay liceyimizning  obro’yini yana bir karra ko’tardi, –deydi IIV Buxoro Akademik litceyi direktori, podpolkovnik Ixtiyor Hamroyev. – Dastlab, 11-14 sentyabr kunlari Buxoro shahrida o’tkazilgan O’zbekiston ochiq turniri sohibasi bo’lgan bo’lsa, 29-30 sentyabr kunlari Qirg’iziston Respublikasida o’tkazilgan Olimpiada chempioni M.Pinigina sovrini uchun yosh atletlar o’rtasidagi xalqaro musobaqada ham qatnashib, 4x100 metr estafetali yugurishda va uzunlikka sakrashda g’oliblik shodasiga yana ikkita oltin hamda 100 metrli yugurishda bronza medallarini qo’lga kiritdi.    

Litcey direktorining alohida ta’kidlashicha, Nigina Isayeva 2019 yil aprel oyida Malayziya davlatiga o’tkaziladigan Osiyo chempionatiga ishtirok etish yo’llanmasini qo’lga kiritgan ekan. U ayni paytda ushbu nufuzli musobaqaga tayyorgarlik ko’rish maqsadida 7-27 noyabr kunlari Turkiya davlatining Antaliya shahrida O’zbekiston terma jamoasi yig’iniga ishtirok etayapti. 

Ha, bir necha karra O’zbekiston hamda ikki karra Osiyo chempioni bo’lgan lavhamiz qahramoniga bu safar ham omadlar yor bo’lishini tilab qolamiz. U yana dunyo bo’ylab O’zbekiston bayrog’ini baland ko’tarib, hilpirlatib yurishiga ishonamiz.

Mirzo AHAD,

O’zbekiston Yozuvchilar uyushmasi a’zosi.

 

Bog`lanish

Muljal: Buxoro viloyat hokimligi binosi

Transportlar: 6,76,33,75,86,88-avtobuslarning “Olmos” kafesi bekati, 72,25,37,11- avtobuslarning “Universitet yotoqxonasi” bekati.
Ish kunlari: Dushanbadan-Shanbagacha
Ish vaqtlari: 8:30 dan-16:30 gacha 
Bukhara 
Uzbekistan, Bukhara 
200114 
Uzbekistan 
Email:bsu_info@edu.uz Phone:0(365) 221-29-14 Fax:8(365) 221-27-07

Revkvizitlar

Молия вазирлиги ғазначилиги              

Ҳисоб рақами: 23402000300100001010 

МФО:00014  ИНН: 201122919        

МарказийбанкХККМТошкент ш.

(БухДУ:400910860064017950100079002)                   

ИНН: 201504275

Тулов максадида ФИО (уникал код езилади)

 

Xarita

 

Biz ijtimoiy tarmoqlarda

   

 

Top
BuxDU ATM tomonidan ishlab chiqildi.
Click to listen highlighted text! Powered By GSpeech