Welcome to Buxoro davlat universiteti rasmiy web sayti   Click to listen highlighted text! Welcome to Buxoro davlat universiteti rasmiy web sayti Powered By GSpeech
Thursday, 05 October 2017 06:40

Buyuk bunyodkorlik yo`lida Featured

Written by 
Rate this item
(0 votes)

Inson zoti borki, u istasa istamasa, bir tuyg`uning asiri bo`lib qolaveradi: bu–Vatan tuyg`usi. Kishiga ulg`aygan sari, to`g`rirog`i, butun hayoti davomida tug`ilib o`sgan yerini qo`msash, sog`inish, unga talpinib yashash, uni anglash, hatto umrining oxirgi daqiqalarida ham kindik qoni tomgan maskan bag`rida bo`lish, o`z yurti tuprog`ida mangu makon topish istagi tinchlik bermaydi.

Ha, yillar o`tgani sayin inson yurt qadrini, o`zi ham shu vatanning bir bo`lak-zarrachasi ekanligini anglab yetadi. Ayniqsa, biz–o`zbeklar uchun vatan aziz, vatan muqaddas, vatan tengsiz teranlik.

Buyuk Istiqlol quchgan ona-O`zbekistonimizning o`tgan yigirma olti yil davomida erishgan, erishayotgan yutuqlari, dunyo hamjamiyatida o`z o`rni, nufuziga ega bo`lishi, xalqimiz mafkurasida ulug` istiqlol-u istiqbolga bo`lgan ishonch, yoshlarimiz qalbida, ko`zlarida porlab turgan bunyodkorlik ishtiyoqi o`zini shu yurtning farzandiman deb hisoblaguvchi har birimizning yuragimizni g`urur-iftixorga to`ldiradi. Shuurimizni shukuronalik tuyg`usi egallaydi. Beixtiyor dilimizdagi tilimizga ko`chadi: qadamlaringdan aylanay, Istiqlol

Vatan tuyg`usi borada shoir Shavkat Rahmonning quyidagi satrlari qalblardan qalblarga soy misol oqaveradi:

Hali biror ishni uddalamadim,
Hali hech kimsani qilmadim rozi,
Behuda o`tibdi go`zal umrimning
Qanchalab chiroyli bahori, yozi.
                Farog`at borligin unutib qo`ydim,
                Bag`rimga chaqinlar tegdi daf'atan,
                Sendan-da ulug`roq narsa yo`qligin
                Sochim oqarganda angladim, Vatan!
Buncha kech angladim,
Nega muncha kech...
Anglasam loaqal o`ttiz yil avval,
Loaqal tug`ilmay turib anglasam...
              Ko`rgan bo`larmidim seni mukammal.
              Hali asl Vatan bo`lmog`ing uchun
              Ovozi toshlarni yorar kuychilar,
              Qanchalab sehrgar shoirlar kerak,
              Qancha bilim kerak, qancha kuch-chidam.
Umrim ko`chkilarday jimjit, shiddatli,
Butkul tinmoq uchun bir kun bemalol
Faqat yaxshi bo`lmoq judayam kamdir,
Juda kamlik qilar yashamoq halol.
              Naqadar kechikib angladim seni,
              Chaqinlar yo`q qilsa meni daf’atan,
              Ayt, qandoq chidayman bunday xo`rlikka,
             Ayt, qandoq yotaman qa’ringda, Vatan!

Ha, bugun biz vatan tuyg`usini Shavkat Rahmonchasiga anglamog`imiz shart. Uning yutuqlaridan, ulug`vorligidan quvonibgina qolmasdan, uning rivojiga, nurli istiqboliga har birimiz o`zimizning sohamiz, tanlagan yo`limiz, ishimiz, o`qishimiz, qolaversa, qilayotgan barcha-barcha harakatlarimiz bilan hissa qo`shmog`imiz shart. Zero, shoir aytganidek, «Faqat yaxshi bo`lmoq judayam kamdir, Juda kamlik qilar yashamoq halol». Demak, yurt kelajagi, ulug` istiqlol va ko`z qorachig`imizdek saqlamoq har birimizdan fidoiylikni talab etadi.

Darhaqiqat, Vatan abadiy, seni atrofingdagilar, o`rni kelganda oshna-og`aynilar tark etganda ham ota-onang kabi vataning tark etmaydi. Vatanni sevish, vananni sevishga undash boshqa narsa, biroq bu tuyg`uni yurakdan his etish, dildan tuyish o`zgacha tuyg`u. Yaqindagina dunyo miqyosida o`tkazilgan nufuzli musobaqalardan birida bokschi yurtdoshimiz buxorolik Shahram G`iyosov oltin medalga sazovor bo`lib jahon chempionligini qo`lga kiritdi. Uning har bir chiqishini oynayi jahon orqali diqqat bilan kuzatib bordik. Yurtdoshimiz taqdirlash jarayonida g`oliblik shohsupasiga ko`tarilar ekan, O`zbekistonning davlat madhiyasi yangray boshladi. Yurtimiz bayrog`i yuqoriga ko`tarilaverdi. Bayroqqa tikilgan sportchimizning ko`zlaridan oqayotgan yoshni ko`rganda qo`shilib yig`ladik. Bu sevinch, shodlik yoshlari edi. Buxorolik sportchi yigitning o`z sohasida erishgan yutug`i, yurtimiz nomiga, hurmat-e’tiboriga qo`shgan hissasi uning qalbida, nafaqat Shahramning, balki butun o`zbekistonliklarning  yuragida vatanga muhabbat hisini to`lqinlantirdi, desak mubolag`a bo`lmas.

«Biz sening fidoying bo`lgaymiz, O`zbekiston» shiori ostida ana shunday ming-minglab yoshlarning, yurt uchun fido insonlarning mushtarak tuyg`ulari o`z e’tirofini topgandek go`yo.

 Yurtimizda yoshlarga, ularning ta’lim-tarbiyasi, kelajagi masalasiga alohida e’tibor qaratilishini dunyo tan olganligi hech birimizga sir emas. Respublikamizda Qonunchilik palatasi tomonidan 2016-yil 12-avgustda qabul qilingan «Yoshlarga oid davlat siyosati to`g`risida” O`zbekiston Respublikasi Qonuni (Bu qonun senat tomonidan 2016-yil 24-avgustda ma’qullangan)ning qabul qilinishi fikrimiz dalilidir. Mazkur qonun hujjatida yoshlarga oid davlat siyosatining asosiy yo`nalishlari sifatida quyidagilarning belgilanishi o`ta muhimdir:

–yoshlarning huquqlari, erkinliklari va qonuniy manfaatlarini ta’minlash;
yoshlarning hayoti va sog`lig`ini saqlash;

–yoshlarning ma’naviy, intellektual, jismoniy va axloqiy jihatdan kamol topishiga ko`maklashish;

–yoshlar uchun ochiq va sifatli ta’limni ta’minlash;
yoshlarni ishga joylashtirish va ularning bandligi uchun shart-sharoitlar yaratish;

–yoshlarni vatanparvarlik, fuqarolik tuyg`usi, bag`rikenglik, qonunlarga, milliy va umuminsoniy qadriyatlarga hurmat ruhida, zararli ta’sirlar
va oqimlarga qarshi tura oladigan, hayotga bo`lgan qat’iy ishonch va qarashlarga ega qilib tarbiyalash;

–yoshlarni axloqiy negizlarni buzishga olib keladigan xatti-harakatlardan, terrorizm va diniy ekstremizm, separatizm, fundamentalizm, zo`ravonlik va shafqatsizlik g`oyalaridan himoya qilish;

–yoshlarning huquqiy ongi va huquqiy madaniyati darajasini yuksaltirish;
iqtidorli va iste’dodli yoshlarni qo`llab quvvatlash hamda rag`batlantirish;
yoshlar tadbirkorligini rivojlantirish uchun shart-sharoitlar yaratish;
yoshlarda sog`lom turmush tarziga intilishni shakllantirish, shuningdek yoshlarning bo`sh vaqtlarini mazmunli tashkil etish va yoshlar sportini ommaviy rivojlantirish uchun shart-sharoitlar yaratish;

–yosh oilalarni ma’naviy va moddiy jihatdan qo`llab-quvvatlash, ular uchun munosib uy-joy va ijtimoiy-maishiy sharoitlarni yaratish bo`yicha kompleks chora-tadbirlar tizimini amalga oshirish;

–yoshlarning huquqlari va erkinliklarini ro`yobga chiqarish sohasida faoliyatni amalga oshiruvchi xalqaro tashkilotlar bilan hamkorlikni rivojlantirish.

Bilamizki, 2017-yil 3-iyul kuni «Xalqaro Press klub»da O`zbekiston Yoshlar Ittifoqi davlat tashkilotini tuzish masalasi o`rtaga tashlandi va yangi tuzilgan O`zbekiston Yoshlar Ittifoqi davlat tashkilotining faoliyatiga bag`ishlangan sessiya bo`lib o`tdi. «Ma`lumki, har qanday islohot, xususan, millionlab yoshlarning hayoti va kelajagiga bevosita daxldor bo'lgan o'zgarishlar har tomonlama chuqur o'ylab ish tutishni, yetti o'lchab, bir kesishni talab etadi. Shu nuqtayi nazardan biz bugun yangi yoshlar tashkilotini tuzmoqchi ekanmiz, shoshilmasdan, vazminlik bilan ish ko'rishimiz, bu masalaning barcha ijobiy va salbiy tomonlarini o'zimizga yaqqol tasavvur qilib, shundan keyin bir xulosa va qarorga kelishimiz lozim»ligini ta’kidladi O`zbekiston Respublikasi Prezidenti 2017-yil 30-iyun kuni bo'lib o'tgan «Kamolot» yoshlar ijtimoiy harakatining IV qurultoyida.

Yurtboshimiz mazkur ittifoq shunchaki qog`ozlarni to`ldirish uchun emas, balki u huquqiy maqomi, asosiy maqsad va vazifalari, uning ijtimoiy hayotimizdagi o'rni va nufuzi, obro'-e`tibori o`ziga xos bo`lishi zarurligiga ham  alohida e`tibor qaratish kerakligi ta`kidladilar. Hozirda respublikamiz bo`ylab yoshlar ittifoqining quyi boshlang`ich tashkilotlari tuzilayotganligi, ularga yetakchilar saylov asosisida saylanayotganligi va, asosiysi, bu jarayonlarning barchasi yoshlarimizni faollashtirib yuborganligi quvonarli holdir.

Ha, ona-yurtimiz buyuk bunyodkorlik yo`lida dadil odimlamoqda. Bu qadamlarning yanada mustahkam bo`lishiga har birimiz o`z hissamizni qo`shish uchun mas’ul ekanligimizni unutmaylik.

Dilorom Yo`ldosheva, Mehriniso Abuzalova,

BuxDU o`zbek tilshunosligi kafedrasi dotsentlari

Read 7990 times Last modified on Monday, 09 October 2017 10:26
Super User

Aslon Ergashev

Leave a comment

Make sure you enter the (*) required information where indicated. HTML code is not allowed.

Top
BuxDU ATM tomonidan ishlab chiqildi.
Click to listen highlighted text! Powered By GSpeech